VOV4.Jarai - Kơnong amăng sa rơwang hrơi tơjuh mơng lơ 14/2 truh lơ 21/2, đơ đam plơi prong hmâo čih pioh 40 čô mơnuih ƀă klin lĕ nai pơtô čơđai hăng rơbêh kơ 430 čô čơđai sang hră. Ƀơi anăp tơlơi ngă tơnap mơng klin ruă, Anom bruă pơtô pơhrăm plơi prong Buôn Ma Thuột hmâo pơphô brơi Jơnum min mơnuih ƀôn sang plơi prong brơi pơdơi jăng jai čơđai nao sang hră hăng ƀing čơđai hơdôm gưl, kơnong kơ anih 9 hăng anih 12 dô̆ glăi hrăm.

Tui hăng Anom bruă pơtô pơhrăm plơi prong Buôn Ma Thuột, Daklak, klin ruă Covid-19 ƀơi Daklak ngă tơnap dong hăng hơdôm rơbâo čô mơnuih ƀă kơman sa hrơi. Ƀơi hơdôm bôh sang hră, khă bruă hmâo mơnuih ƀă kơman klin hmâo tơlơi prăp lui hlâo laih, samơ̆ mrô F0 đĭ lu hmâo bơbeč truh prong laih pran jua ƀing nai pơtô, čơđai sang hră, amĭ ama čơđai sang hră. Pơgang, pơgăn rah klin Covid-19, pơtô pơhrăm ba glăi bôh tơhnal rah, pơhlôm rah pran jua kơ čơđai sang hră, amĭ ama čơđai, nai pơtô jing bôh than phun mơng sang hră ră anai./.

Siu H’ Prăk: Pơblang