Lơ 7/8, Ding jum pơtô pơjuăt pơphun jơnum lăng nao rai mơng ataih pok pơhai tal pơplông “Đơ đam dêh čar pơplông pơplih pơčeh phrâo hăng pơplih mrô” hăng tơlơi pơphun “Pơtô brơi mơnuih ƀôn sang yua boh thâo ia rơgơi”. Jơnum hơmâo pơlăng nao rai hăng giăm 600 anih mơng gơnong bruă pơtô pơjuăt; hơdôm anih anom pơtô hrăm gưl prong hăng pơtô bruă mă amăng đơ đam dêh čar. Đĭ pơhiăp pơphun tal pơplông, Kơ-iăng Khua ding jum pơtô pơjuăt Nguyễn Văn Phúc pơsit tong, pơplih yua boh thâo ia rơgơi amăng pơtô hrăm pok rai tơlơi dưi aka ƀu hơmâo ôh kiăng hrưn đĭ klă dong amăng pơtô hrăm, pơplih jơlan hơdră pơtô hrăm, pơhlôm pơhrăm mă hajăn, pok prong tơlơi dưi tŭ mă tơlơi thâo thăi brơi abih bang mơnuih ƀôn sang.

Kiăng bruă anai ba glăi boh tŭ yua hloh, gơnong bruă amra đing nao ngă klă 8 bruă jao akŏ phun, amăng anun kơtưn pơtô hrăm yua boh thâo phrâo hăng hơdôm bruă kơsem min yua boh thâo măi mok brơi kơ ƀing čơđai sang hră gưl anet, gưl prong. Amăng mông jơnum, ƀing pơ ala hơdôm boh sang hră, gơnong bruă pơtô pơjuăt ăt pơlăi nao rai tơlơi găn rơgao pok pơhai hơdôm boh tơhnal, jơlan hơdră pơplih yua boh thâo ia rơgơi hăng “pơtô brơi mơnuih ƀôn sang yua boh thâo phrâo”, laih dong ba tơbiă hơdră bruă kiăng bruă ngă tui dua tơlơi pơplông jai hrơi sit nik hăng bruă pơtô hrăm ƀơi ƀon lan.