VOV4.Jarai - Čơtlăm tom brơi (25/5), ƀơi Hà Nội, Grŭp hyu mă bruă mrô 5 mơng Grŭp črâo ba bruă pơgang, pơgăn hưp ƀong kông ngăn, tơlơi ƀu klă yua kơ ơi Nguyễn Hòa Bình, Ding kơna Ding jum kơđi čar, ding kơna git gai Ping gah, Khua Sang phăt kơđi dêh čar, Ding kơna Grŭp črâo ba ngă Khua Grŭp hmâo laih mông mă bruă hăng Grŭp mă bruă Ping gah Ding jum đang hmua hăng pơđĭ kyar ƀôn lan dêh čar tui kơčăo bruă mrô 18 mơng Grŭp črâo ba.

Pơhiăp amăng mông mă bruă, ơi Nguyễn Hòa Bình rơkâo Grŭp mă bruă Ding jum đang hmua hăng pơđĭ kyar ƀôn lan dêh čar prăp lui hră pơ-ar, bôh yôm lăi pơthâo glăi, lăi pơblang tui tơlơi rơkâo mơng Grŭp hyu mă bruă. Rơgao kơ tal pel ĕp amra pơsit hơdôm mơta bruă dưi ngă, akă dưi ngă kiăng pơsir tơlơi pơhing, ƀom ƀing ngă soh gah bruă gơgrong mơng Ding jum đang hmua hăng pơđĭ kyar ƀôn lan dêh čar mơng anun ba tơbiă, rơkâo đĭ Ding jum kơđi čar, Grŭp črâo ba hơdôm bruă pioh pơsir hrom amăng đơ đam dêh čar pơ̆ anăp anai./.

Siu H’ Prăk: Pơblang