VOV4.Jarai - Mơguah lơ 8/4, ƀơi Sang mă bruă Khua pơ ala mơnuih ƀôn sang dêh čar, Grŭp lăng tui akô̆ bruă “Bruă ngă tui tơlơi phiăn gah tŭ jum mơnuih ƀôn sang hăng pơsir tơlơi ƀom kiơng, tơgŭ kơđi mơng lơ 1/7/2016 truh lơ 1/7/2021” yua kơ Kơ-iăng Khua git gai wai lăng pơ ala mơnuih ƀôn sang dêh čar ta, ơi Trần Quang Phương ngă khua grŭp hmâo mông mă bruă hăng Ding jum wai lăng mơnuih mă bruă, tơhan rơka ruă hăng mơnuih mơnam. Grŭp lăng tui rơkâo pơsit rơđah hăng mơnuih ƀu lăp čơkă mă hơdră gum djru kơ mơnuih djru ngă hơkrŭ đưm; hmâo jơlan pơsir tơlơi ƀom kiơng amăng bruă anai kiăng pơhlôm hơđong kơ mơnuih ƀôn sang. Amăng tơlơi lăi pơthâo glăi, Ding jum wai lăng mơnuih mă bruă, tơhan rơka ruă hăng mơnuih mơnam brơi thâo, hmâo tŭ jum laih rơbêh kơ 14 rơbâo 300 wot čô mơnuih. Bruă tŭ jum mơnuih ƀôn sang dưi ngă tui pơkĕ hrom kơplah wah bruă čih amăng hră tŭ jum mơnuih ƀôn sang hăng mă yua kompiutơr wai lăng tŭ jum mơnuih ƀôn sang, pơsir tơlơi ƀom kiơng mơng Ding jum, hmâo tô nao rai yak phun hăng anih anom djă pioh mơng dêh čar gah tơlơi ƀom kiơng mơng Grŭp pel ĕp kơđi tơlơi Gong gai dêh čar. Ƀing ding kơna mơng Grŭp lăng tui rơkâo ngă rơđah hơdôm hră ƀom kiơng amăng bruă yua kơ Ding jum wai lăng mơnuih mă bruă, tơhan rơka ruă hăng mơnuih mơnam gơgrong, đing nao biă ñu amăng bruă djru mơnuih djru gum ngă hơkrŭ đưm hăng hră pơgang gah mơnuih mơnam, hmâo giăm truh 90%./.

Siu H’ Prăk: Pơblang