Kơ-iăng khua dêh čar ơi Trần Lưu Quang git gai mông mă bruă. Lu tơlơi lăi pơthâo ƀuh rơđah, kual Dap Kơdư hơmâo lu anŏ gêh găl amăng bruă pơđĭ kyar bơwih ƀong huă: bruă ngă hmua, tuh tia pơkra ming gơnam boh troh đang hmua, gơnam mơ̆ng kyâo pơtâo, apui yua pơkra glăi, pơđĭ kyar bruă tuh tia pơkra ming, ĕp gram gơnam amăng gŭ lŏn, eh pơsơi bauxite, pơđĭ kyar bruă tuai hyu ngui hăng ĕp lăng gru grua hiam djop djuai ania. Khă tui anun, pơđĭ kyar bơwih ƀong huă aka ƀu hơmâo anŏ pơblih kơtang ôh, djop anom bruă bơwih ƀong huă phun aka ƀu ba glăi boh tŭ yua lu ôh.

Khua mua amăng djop tơring čar kual Dap Kơdư lăi lĕ, anih anom yôm phara, kual Dap Kơdư kiăng hơmâo tơlơi phiăn jơlan hơdră pơkă phara pioh pơtrut pơđĭ kyar, mă yua anŏ gêh găl, gơnam hơmâo laih hlâo, kiăng pơklaih hĭ mơ̆ng anih tơnap tap hloh pơkă hăng anih pơkŏn amăng dêh čar ta. Tŭ ư hăng tơlơi kiăng tui anun, Kơ-iăng Khua dêh čar ơi Trần Lưu Quang lăi pơtong, kual Dap Kơdư jing anih anom gơgrong, anih yôm phara biă mă kơ tơlơi bơwih ƀong huă, kơđi čar, mơnuih mơnam, pơgang lŏn ia, rơnuk rơnua kơ dêh čar, anun yơh tui hăng tơlơi git gai hrŏm, kiăng hơmâo anŏ djru ba, đing nao khom hơmâo jơlan hơdră, tơlơi phiăn, gơnam yua mă bruă pioh lui kơ kual anai thun blan pơ anăp adih.