Tơdơi kơ 15 thun ngă tui Hră pơčrâo trun mơ̆ng Khul git gai ping gah dêh čar pơtrut bruă mă pơhlôm nua ia jrao amăng rơnuk phrâo, truh ră anai mrô mơnuih blơi hră pơhlôm nua ia jrao ƀơi tơring čar Kon Tum hơmâo truh 93%. Amăng anun, mrô mơnuih blơi hră pơhlôm nua ia jrao mơ̆ng sang anŏ hơmâo 16%; rơbêh 85% mrô mơnuih ƀôn sang amăng tơring čar hơmâo čih anăn, wai lăng hră čih anăn pơgang tơlơi suaih pral amăng plăng điện tử ƀơi sang ia jrao să hăng abih bang nao pơ sang ia jrao să dưi pơkă lăng, pơjrao tơlơi duăm ruă hơmâo hră pơhlôm nua ia jrao.

Pơhiăp ƀơi mông jơnum, ơi Vũ Thanh Mai, Kơ-iăng Khua anom pơtô bruă ping gah dêh čar lăi lĕ, hrŏm hăng bruă djru mơ̆ng dêh čar, kiăng pơgang ba mrô mơnuih ƀôn sang dưi blơi djop hră pơhlôm nua ia jrao, Kon Tum kiăng pơtrut bruă pôr pơthâo, pơtô pơblang kơ jơlan hơdră kơnuk kơna djru hăng anŏ tŭ yua kơ pô hơmâo hră pơhlôm nua ia jrao; pơtrut tui bruă pơjrao tơlơi duăm ruă ƀơi kual plơi pla, boh nik ñu pơđĭ tui boh tŭ yua hơdră pơkă lăng, pơjrao duăm ruă, ngă gêh găl brơi mơnuih ƀôn sang duăm ruă dưi tŭ mă, tơlơi djru gah bruă pơjrao duăm ruă.