VOV4.Jarai-Tlam lơ ¾, grup hyu mă bruă mơ̆ng Ding jum Bruă hmua hăng Pơđĭ kyar plơi pla nao ĕp lăng bruă rŭ glăi pơsir tơlơi truh yua hơjan prong ƀơi tơring čar Quảng Bình. Amăng 3 hrơi rơgao, tơring čar Quảng Bình hơmâo hơjan prong biă mă ƀơi lu anih. Anai lĕ, hơjan prong ƀu djơ̆ bơyan ôh, ngă răm ƀăm prong kơ bruă ngă hmua pla pơjing, biă mă ñu bơyan pơdai puih phang. Hơjan prong ngă ia dăo abih 5.900 ha hmua pơdai, amăng anun tơring glông Lệ Thủy truh 3.700 ha, tơring glông Quảng Ninh rơbêh 1000 ha.

Quảng Bình hơmâo rơbêh 910 ha hmua pơdai, lu gruh prong rông ačung kô̆ ia rơsĭ hăng hơdôm hơpluh gruh rông akan răm ƀăm soh. Mah hơjan ưt laih samơ̆ lu đơ đam hmua pơdai, phun pla ia dăo ƀơi kual plŭng dơnung tơring glông Quảng Ninh, Lệ Thủy. Quảng Bình rơkâo hăng Ding jum Bruă hmua hăng Pơđĭ kyar plơi pla djru pơjeh phun pla, djuai hlô mơnong rông pioh rŭ glăi bruă ngă hmua rông hlô mơnong.

Pơ anăp adih, tơring čar rơkâo Gơnong dlông djru prăk pơkra glăi bơnư̆ hnoh ia, king hmua pơ hơdôm anih plŭng dơnung, bơnư̆ răm; djru prăk pơkra glăi jơlan glông ƀơi anih hŭi lŏn tơhlom ječ ameč kiăng mơnuih ƀôn sang hơđong tơlơi hơdip mơda, rŭ glăi bruă mă bơwih ƀong huă.

Nay Jek: Pơblang