VOV4.Jarai - Amăng 2 hrơi lơ 26 hăng lơ 27/7, Jơlan hơdră Jơnum ngui bơyan pơdơi prong Việt Nam 2022 pơphun sa dua bruă mă ƀơi plơi prong Huế, tơring čar Thừa Thiên Huế. Jơlan hơdră anai pơphun mơng lơ 19/7 truh lơ 3/8 ƀơi 9 bôh tơring čar, ƀôn prong hăng tơlơi gum hrom mơng 108 čô khua pơ ala amăng hnưr thun mơng 16 ttruh kơ 24 thun, mơnuih pơ ala kơ rơnuk hlăk ai Việt Nam pơ̆ dêh čar tač rơngiao pơwot glăi mơng 25 bôh dêh čar.

Grŭp jơnum ngui bơyan pơdơi prong Việt Nam 2022 čơphin rŭp djă pioh ƀơi Đại Nội Huế

Ƀơi Huế, ƀing hlăk ai mơng jơlan hơdră jơnum ngui bơyan pơdơi prong Việt Nam 2022 gum hrom lu bruă mă kah hăng pơplông ră ruai akhan hăng tơlơi Yuan, hyu čuă lăng Sang phơ̆t Linh Mụ, Đại Nội Huế, ƀơk gơnam tam gum djru, bơkơtuai nao rai tơlơi ngui ngor lu mơnuih ƀơi tơdrŏn čuah ia rơsĭ Lăng Cô. Grŭp dưi ƀong hơdôm gơnam ƀong pha ra ha jăn mơng Huế hăng găn rơgao lăng bruă pơkra ia če Huế đưm. Yap mơng thun 2004, Bruă jơnum ngui pơdơi prong Việt Nam hmâo ngă pơhư̆č laih tơlơi gum hrom mơng giăm truh 2.000 čô tơdăm dra, ƀing hrăm gưl dlông Việt Nam mơng rơbêh kơ 30 bôh dêh čar hăng kual lŏn. Ƀing mơnuih pơ ala gum hrom jơlan hơdră lĕ hơdôm mơnuih ngă gru ba jơlan hlâo amăng hơdôm bruă pơhrăm, bơkơjăp drơi jăn, adôh suang hăng hmâo tơlơi gum hơgôp klă kơ bruă pơdŏng khul grŭp, plơi pla./.

Siu H’ Prăk: Pơblang