VOV4.Jarai - Lơ 19/5, Ding kơna apăn bruă Ping gah, Khua Gong phun pơtui jua pơhiăp dêh čar Việt Nam ơi Đỗ Tiến Sỹ hrŏm hăng khua mua mơng Anom bruă nao čuă hăng tŭi ñang ƀơi Anih gru đưm amăng rơ-ưng Trầm - pra yang Trầm, să Phụng Châu, tơring glông Chương Mỹ, ƀon prong Hà Nội, ƀrô hrơi hơdor glăi 132 thun hrơi tơkeng Khua mir sir Hồ Chí Minh. Anai jing anih Gong phun jua pơhiăp Việt Nam pôr pơthâo “Tơlơi jak iâu abih bang pơkơdong glăi ayăt” mơng Khua mir sir Hồ Chí Minh amăng mlăm lơ 19/12/1946. Ƀơi mông nao tŭi ñang, Khua Gong phun jua pơhiăp Việt Nam Đỗ Tiến Sỹ hrŏm hăng ƀing khua mơng anom bruă wơ̆t hăng khua mua să Phụng Châu, tơring glông Chương Mỹ tŭi ñang ƀơi pra yang phun hăng amăng rơ-ưng Trầm, hơdor glăi gru grua đưm ƀơi pra yang Chùa Trầm sui mơng anai 76 thun. Ƀơi mông nao čuă hăng ngă bruă tom khua mua Jơnum min mơnuih ƀon sang să Phụng Châu, tơring glông Chương Mỹ (ƀon prong Hà Nội), Khua Gong phun jua pơhiăp Việt Nam ơi Đỗ Tiến Sỹ bơni kơ Jơnum min mơnuih ƀon sang să Phụng Châu gum pơgang ba Anih gru đưm amăng rơ-ưng Trầm - pra yang Trầm, anih Gong phun jua pơhiăp Việt Nam hơmâo bưng, tơphă dưi pơdong anih ngă bruă blung a amăng rơnuk blah ayăt, pơgang lŏn ia.

Siu H’Mai: Pơblang