VOV4.Jarai-Hơdor glăi tal 77 thun hrơi Hơkrŭ blan čơpăn, 77 thun Hrơi gru grua tơhan kông an mơnuih ƀôn sang lơ 19/8 hăng 17 thun hrơi abih bang mơnuih ƀôn sang ngă hrom pơgang rơnuk rơnua dêh čar, lơ 19/8, ƀơi Hà Nội, Grup khua mua pơ ala ping gah Kông an dêh čar hăng Ding jum jum kông an yua kơ Khua tơhen krên dên ơi Tô Lâm, ding kơna ding jum kơđi čar, Khua git gai ping gah Ding jum kông an, Khua ding jum kông an ba jơlan hlâo nao dưm guang bơnga hăng čuă pơsat jep Khua mir sir Hồ Chí Minh.

Găn rơgao 77 thun pơ klôn adih, akŏ pơdong, blah ngă hăng đĭ prong tui, tơhan kông an mơnuih ƀôn sang hrom hăng Ping gah, mơnuih ƀôn sang, ling tơhan amăng dêh čar hơmâo ngă bruă ba glăi boh tŭ yua prong biă mă amăng bruă ngă hơkrŭ pơklaih rơngai djuai ania, bơrơsua glăi kơnuk kơna, kiăng pơlir truh kih lŏn ia jing sa, rơngai kơ mơnuih ƀôn sang man pơdong hăng wai pơgang dêh čar. Ră anai, amăng tơlơi pơhing phrâo, dong ƀơi anăp kơ tơlơi lông lăng ƀu anet hăng tơlơi gêh găl plah wah hrom, kiăng ngă klă hloh tơlơi gơgrong, bruă mă phun mơ̆ng tơhan ba akŏ hlâo amăng bruă pơgang rơnuk rơnua lŏn ia, pơgang hơđong kơ mơnuih mơnam Ping gah, kơnuk kơna hăng mơnuih ƀôn sang ta sit mơ̆n abih bang khua mua hăng ling tơhan kông an mơnuih ƀôn sang ăt djă pioh ngă tui gru grua khin hơtai, hing ang, gir run ƀu pơdơi ôh, găn rơgao abih tơlơi tơnap tap, lông lăng, ngă giong bruă jao.

Nay Jek: Pơblang