VOV4.Jarai - “Tañ hơmâo hơdră pơsir bruă arăng blơi sĭ lŏn pơƀlor mă, đah mơng huăi ngă sat kơ tơlơi pơđĭ kyar bơwih ƀong mơnuih mơnam”. Anai lĕ tơlơi kiăng mơng khua mua pơ ala mơnuih ƀon sang dêh čar tơring čar Dak Lăk ƀơi mông ngă bruă hăng Gơnong bruă wai lăng kông ngăn lŏn tơnah hăng ayuh hyiăng kơ bruă ngă tui jơlan hơdră pơtrun, tơlơi phiăn pơkrem, huăi prai ngăn drăp, thun 2016-2021 amăng lơ 13/4. Tui hăng Gơnong bruă kông ngăn lŏn tơnah hăng ayuh hyiăng tơring čar Dak Lăk, jŭ yap amăng 3 blan akŏ thun 2022, bruă arăng blơi sĭ lŏn lu biă mă, hăng 103.000 wơ̆t, đĭ giăm 200% pơhmu hăng tơđar thun hlâo. Nua lŏn ăt pơmă mơn pơhmu hăng 3 blan tal 4 thun 2021.

Ƀơi anăp tơlơi anai, Gơnong bruă kông ngăn lŏn tơnah hăng ayuh hyiăng hơmâo hră lăi pơthâo kơ Jơnum min mơnuih ƀon sang tơring čar git gai hơdôm boh tơring glông wai lăng kơjăp bruă pơplih tơlơi dưi mă yua lŏn tơnah. Khua mua kiăng gơnong bruă kông ngăn lŏn tơnah hăng ayuh hyiăng tơring čar Dak Lăk pơtrut hyu pơtô pơblang, lăi pơthâo tơlơi phiăn đah mơng thâo pơkrem, huăi prai ngăn drăp. Laih dong, gơñăm nao bruă wai lăng prăk kơnuk kơna, mơnuih mă bruă, hnă gơnam, pơhlôm mă yua lŏn tơnah, ia yua, pơtâo čuah djơ̆ tơlơi phiăn, tŭ yua.

Siu H’Mai: Pơblang