VOV4.Jarai - Tlam lơ 12/1, grup mă bruă mơng Anom bruă jŭ yap prăk kăk yua ơi Trần Sỹ Thanh, Ding kơna Khul khua git gai Ping gah, Khua jŭ yap prăk kăk kơnuk kơna ngă khua grup hơmâo pioh mông ngă bruă hăng khua mua tơring čar Dak Lăk kơ bruă lăi pơthâo glăi prăk kăk mơng tơring čar. Lăi pơthâo hăng grup mă bruă, Khua git gai Ping gah tơring čar Dak Lăk ơi Nguyễn Đình Trung hơmâo lăi nao hơdôm tơlơi dưi ngă mơng tơring čar amăng hrơi blan rơgao, amăng anun, djŏp gưl, anom bruă hơmâo pok pơhai ngă tui klă tơlơi git gai mơng Ping gah, Kơnuk kơna, Khua dêh čar, hơmâo ngă dua mơta bruă, ƀrô bơwih ƀong, pơhlôm ba tơlơi hơdip mơnuih ƀon sang rah, ƀrô pok pơhai khut khăt tŭ yua hơdôm bruă pơgang klin Covid-19.

Pơhiăp ƀơi mông ngă bruă, ơi Trần Sỹ Thanh lăng yôm hăng bơni kơ hơdôm tơlơi mơ̆ Dak Lăk hơmâo ngă amăng hrơi blan rơgao, biă ñu amăng bruă pơhưč arăng tuh pơ plai hăng djru kơ anom bơwih ƀong. Biă ñu, Dak Lăk kiăng pơtrut pơsir tañ hơdôm tơlơi aka ƀu dưi ngă ƀơi mông lăi pơthâo glăi mrô prăk mơng tơring čar mơng thun 2016 pơ tlôn adih mơ̆ Anom bruă jŭ yap prăk kơnuk kơna hơmâo pơthâo glăi rơđah.

Siu H’Mai: Pơblang