Mơguah lơ 10/12, Grŭp pel ĕp kơđi tơlơi Jơnum min djuai ania yua kơ ơi Võ Văn Bảy – Khua Anom pel ĕp kơđi tơlơi Jơnum min djuaia nia ngă Khua grŭp hmâo mông mă bruă hăng Jơnum min mơnuih ƀôn sang tơring čar Dak Lak kiăng hluai tui hră čih pơkra Tơlơi klah čun pel ĕp bruă ngă tui Jơlan hơdră pơkă mơ̆ng lŏn ia pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng rơwang mơ̆ng thun 2021-2030, rơwang I: 2021-2025 (iâo klah čun lĕ Jơlan hơdră 1719) ƀơi tơring čar Dak Lak.

Tui hăng Hră čih klah čun, Jơlan hơdră 1719 ƀơi Dak Lak hmâo pok pơhai klă, ba glăi lu bôh tơhnal lăp djă pioh amăng gir run neh wa djuai ania ƀiă, pơplih anom mă yua hăng pơđĭ tơlơi hơdip mơda mơnuih ƀôn sang. Tŭ mă hơdôm tơlơi gum pơhiăp mơ̆ng Grŭp pel ĕp kơđi tơlơi Jơnum min djuai ania, yă H’Yim Kđoh, Kơ-iăng Khua Jơnum min mơnuih ƀôn sang tơring čar Dak Lak bơni kơ grŭp pel ĕp kơđi tơlơi črâo tơbiă laih hơdôm bruă tơring čar akă dưi ngă, anăp nao pơsir pơ̆ anăp anai. Hrŏm hăng anun Kơ-iăng Khua Jơnum min mơnuih ƀôn sang tơring čar Dak Lak pơtŏng sit, pơ̆ anăp anai amra khut khăt hloh dong amăng bruă ngă tui hơdôm Rơwang bruă mơ̆ng Jơlan hơdră 1719 ƀơi tơring čar./.