Tui lăi pơthâo klah čun, Khul apăn bruă Ping gah tơring čar Dak Lak hơmâo pơphun hruă kjăp, kơsem min, pok pơhai hơdôm tơlơi pơtrun, tơlơi črâo trun, tơlơi klah čun mơng gơnong glông; ba tơbiă hơdôm hră pơ-ar git gai, črâo ba hơdôm anom bruă, sang bruă pok pơhai ngă tui tơlơi klah čun, tơlơi pơtrun mrô 18, tơlơi klah čun mrô 121, tơlơi črâo trun mrô 35, tơlơi pơtrun mrô 57, tơlơi klah čun mrô 123 hăng hơdôm tơlơi klah čun bơdjơ̆ nao mơng gơnong glông.

Khul apăn bruă Ping gah tơring čar hơmâo ngă tui khut khăt, hmao tlôn amăng bruă prap lui Jơnum djop gưl; bruă ruah mơnuih apăn bruă hơmâo git gai kjăp, tong ten, lăp djơ̆ tơlơi pơkă, jơlan gah, kiăo tui tơlơi črâo trun mơng gơnong glông, pơhlôm tŏ tui hăng pơđĭ kyar. Khul apăn bruă Ping gah tơring čar Dak Lak ăt đing nao git gai, črâo ba akŏ bruă dưm dăp, ngă hơbot anih anom mă bruă tui tơlơi pơtrun mrô 18; pơtrut kơtang bruă mă yua boh thâo phrâo, pơplih pơčeh phrâo hăng yua boh thâo mrô. Hơnong pơkă pơđĭ kyar thun 2025 hơmâo pơplih đĭ 8% lăp djơ̆ tơlơi rơkâo mơng gơnong glông.