VOV4.Jarai - Tlam lơ 9/3, ƀơi sang bruă pơ ala mơnuih ƀon sang, Grup wai lăng mơng Ƀirô khua git gai pơ ala mơnuih ƀon sang dêh čar kơ “Bruă ngă tui tơlơi pơtrun, tơlơi phiăn dưm dăp čuk pơkra dong mơng Tơlơi phiăn dưm dăp, prăp lui bruă dưi mă yua” hơmâo ngă bruă hăng ƀon prong Hồ Chí Minh, tơring čar Đồng Nai hăng Bình Dương jơnum lăng mơng ataih amăng tivi. Tui hăng grup khua wai lăng, mơng tơlơi lăi pơthâo glăi mơng 3 boh tơring čar ƀon prong, dŏ hơmâo lu bruă kiăng ngă rơđah anun lĕ bruă čih pơkra hăng pơdah pơƀuh kơ Khua dêh čar pơsit dưm dăp man pơkra ƀon prong, čuk pơkra man pơdong 2 boh tơring čar rơwang thun 2021-2030 ră anai lêng kaih soh, ƀon prong Hồ Chí Minh aka ƀu pơsit ôh bruă dưm dăp čuk pơkra anih anom; tơring čar Bình Dương aka ƀu ruah mă mơn pô pơtô dưm dăp čuk pơkra anih; tơring čar Đồng Nai glăk pơphun ngă.

Pơhiăp tum pơƀut glăi mông jơnum, Kơ-iăng khua git gai pơ ala mơnuih ƀon sang dêh čar ơi Nguyễn Đức Hải brơi thâo, hơdôm boh tơring čar, ƀon prong kiăng kơđiăng hơdôm tơlơi rơkâo kiăng ngă bruă; hơdôm tơlơi pơkôl pơkă bơdjơ̆ nao ruah tơlơi pơtô ba čih pơkra hơdră čuk pơkra man pơdong; hơdôm tơlơi pơtrun kơ pơplih bruă dưm dăp čuk pơkra anih anom djơ̆ hăng tơlơi hơmâo sit, hơdôm tơlơi pơkôl pơkă pơhlôm tơlơi wai lăng mơng kơnuk kơna lơ̆m lui hĭ hơdôm bruă dưm dăp prăp lui gơnam tam.

Siu H’Mai: Pơblang