VOV4.Jarai - Hơdôm hrơi anai, ƀơi 7 bôh să guai tơring čar Daknông glăk dik dak pơphun Hrơi jơnum ngui Abih bang mơnuih ƀôn sang pơgang guai lŏn ia thun 2022, ngă lu mơnuih djop djuai ania amăng tơring čar gum hrom.

Amăng mông jơnum ngui hrom hăng hơdôm bruă mă bôh thâo adôh suang djă jă gru grua bôh thâo djuai ania, ƀing pơ ala hmâo lăi pơthâo tơlơi găn rơgao amăng ngă tui hơdôm bruă bơkơtưn ƀơi plơi pla anom bruă kah hăng “Bruă mơnuih ƀôn sang gum hrom wai lăng mă pô guai lŏn ia, pŏng gong guai hăng djă pioh hơđong plơi pla ala ƀôn kual guai lŏn ia”; “Bruă bơkơtưn “Đơ đam lŏn ia gum tơngan hrom yua kơ mơnuih ƀun rin, ƀu lui lơi hlơi gah tlôn”; hăng hơdôm jơlan hơdră “Čung cơđai nao sang hră”, “Ană rông mơng puih kơđông”, “Gum hrom đah kơmơi guai lŏn ia”... Amăng hrơi jơnum ngui Abih bang mơnuih ƀôn sang pơgang guai lŏn ia ƀơi să Thuận An, Ƀirô git gai khul ling tơhan pơgang guai lŏn ia tơring čar Daknông hmâo ƀơk laih Kỷ niệm chương “Yua kơ pô guai lŏn ia rơnuk rơnua” mơng Ƀirô pơtrun bruă ling tơhan pơgang guai lŏn ia kơ sa čô mơnuih hmâo lu tơlơi gum hơgôp amăng bruă wai lăng, pơgang pô, rơnuk rơnua guai lŏn ia./. 

Siu H’ Prăk: Pơblang