VOV4.Jarai - Khul apăn bruă Ping gah ƀôn prong Hải Phòng phrâo hơmâo hră pơtrun kiăng kơ pŭ ba đuăi Anom bruă kơđi čar - Anih ngă hră pơ-ar kơ mơnuih ƀon sang amăng ƀôn prong ba nao pơ kual kơdư ia krông Cấm. Hăng hơnong pơkă man pơdong anih anom mă bruă brơi hơdôm anom bruă kơđi čar, anih ngă hră pơ-ar mơnuih ƀon sang amăng ƀôn prong tui hơdră dưm dăp pơƀut hơƀot, pơlir hơbit, pơplih phrâo, ngă gêh gal hăng pơkrem giăm plai ƀiă rơngiă prăk kak lơ̆m mơnuih ƀon sang, anom bơwih ƀong sĭ mơdrô nao mă bruă.

Him lăng truh rơwang tal I/2025 amra pơgiong anih mă bruă brơi anom bruă kơđi čar, anih ngă hră pơ-ar phrâo. Ring bruă hơmâo man pơkra tui hăng hơnong pơkă tum pơƀut, pơdah gru grua yôm phara hăng hơdôm anŏ sô hơđăp pioh glăi amăng ƀôn prong; pơgôp pơđĭ kyar ƀôn prong Hải Phòng djơ̆ hăng tơlơi dưi, kơdrưh ang, anăp nao hơnong pơkă ƀôn prong hiam hloh, ƀôn prong thâo rơgơi, ƀôn prong mơtah.

Siu Đoan: Pơblang