Jơnum anai, hơmâo pơhưč rơbêh 100 čô khua mua sĭ mơdrô nao pơhmư̆. Pơ anai, gơñu pơbưp nao rai bơnah či ngă hrŏm sĭ mơdrô, hơduah ĕp tơlơi pơhing, anŏ gêh găl djop anŏ kiăng blơi hăng sĭ mơdrô gơnam boh troh đang hmua, 18 boh sang bruă sĭ mơdrô dêh čar Hàn Quốc hơmâo kĭ 42 pok hră hơdor pioh ngă hrŏm sĭ hăng blơi gơnam sĭ mơdrô mơ̆ng djop sang bruă mơdrô ƀơi kual Dap Kơdư.
Amăng anun, lu biă mă ñu gơnam tam boh troh kah hăng kơphê, asar makka, boh troh pơkŏn, añăm pơtam, hơbơi pơtơi….Tơdơi kơ kĭ pơkôl hră hơdor pioh, dua bơnah ăt pơčrong sai nao rai, ngă tui tum teč hloh hơdôm tơlơi pơkôl pơkă kiăng kĭ hră pơkôl blơi lu gơnam tam sĭ mơdrô. Ơi Trần Hải Linh, ding kơna Jơnum min djop djuai ania mơnuih mơnam Việt Nam, Khua khul ngă hrŏm bruă sĭ mơdrô dêh čar Việt Nam hăng Hàn Quốc brơi thâo, ngă hrŏm na nao hăng djop anom bruă sĭ mơdrô kiăng djru pơphun brơi mông hơduah ĕp bruă sĭ mơdrô ngă hrŏm plah wah Việt Nam hăng Hàn Quốc jai hrơi tŭ yua hloh.
Viết bình luận