VOV4.Jarai - Ding jum ia jrao him lăng amra jao “Hră tlâ̆o vaccine” dong mơng lơ 15/4 pơ anăp anai kiăng mơnuih ƀon sang gêh gal lơ̆m tơbiă hyu pơ dêh čar tač rơngiao. Anai lĕ tơlơi pơhing hơmâo lăi pơthâo amăng Jơnum lăng nao rai mơng ataih yua Ding jum ia jrao pơphun kiăng kơ črâo ba pok pơhai bruă jao “Hră tlâ̆o vaccine” hăng hruă kjăp amăng bruă pơhrua, pơsit tong hră pơ-ar tlâ̆o vaccine Covid-19. Truh lơ 1/4, đơ đam dêh čar hơmâo tlâ̆o brơi rơbêh 200 klăk liều vaccine pơgang klin Covid-19. Mrô mơnuih tlâ̆o vaccine mơng 18 thun pơ glông ară tal 1 giăm 100%, ară tal 2 99%, hăng mrô mơnuih tlâ̆o ară tal 3 giăm 50%. Hăng mơnuih mơng 12 truh pơ 17 thun, mrô mơnuih tlâ̆o ară tal 1 lĕ 99% hăng ară tal 2 lĕ 94%. Ding jum ia jrao hăng hơdôm ƀon lan ăt glăk prap lui tlâ̆o vaccine Covid-19 brơi čơđai mơng 5 truh pơ gŭ 12 thun. Amăng hrơi blan anai, djop anih anom tlâ̆o ia jrao amăng đơ đam dêh čar glăk prap lui gơnam tal kiăng Ding jum ia jrao pơphun jao “Hră tlâ̆o vaccine” brơi mơnuih ƀon sang dong mơng lơ 15/4 pơ anăp anai. “Hră tlâ̆o vaccine” amra pơdah ƀuh amăng ứng dụng Sổ sức khoẻ điện tử, PC-Covid ƀudah ĕp amăng plang pơhing điện tử mơng Ding jum ia jrao.

Siu Đoan: Pơblang