Khua pơ ala mơnuih ƀôn sang dêh čar brơi thâo, tal plĕ hră ruah khua pơ ala mơnuih ƀôn sang XVI hăng ƀing pơ ala mơnuih ƀôn sang djop gưl, rơwang bruă thun 2026-2031 phrâo anai, mơnuih ƀôn sang ruah khua amăng dêh čar nao plĕ hră ruah khua lu biă mă, hơmâo năng ai truh 99,69%; ƀu hơmâo pơphun glăi plĕ hră ruah khua pơ anih pơpă ôh, jŭ yap glăi tong ten djop anih plĕ hră ruah khua amăng dêh čar. Ră anai, djop plơi pla ăt hlăk jŭ yap glăi tong ten, pioh lăi pơthâo hăng khua pơphun ruah khua dêh čar.  Him lăng truh mơguah lơ 22/3, Khul pơphun ruah khua dêh čar lăi pơthâo boh tơhnal plĕ hră ruah khua. Tui hăng boh tơhnal anun, amra čih anăn abih bang ƀing djơ̆ anăn ngă pô pơ ala mơnuih ƀôn sang dêh čar, Jơnum min gah bruă ƀing pơ ala pơtong glăi kơnuih pơkă kơ sa čô mơnuih ngă pô pơ ala mơnuih ƀôn sang dêh čar.

Kơ bruă mă čih pơkra tơlơi phiăn dêh čar amăng rơwang bruă tal XVI  lăi pơthâo Ding jum kơđi čar, tui hăng khua git gai pơ ala mơnuih ƀôn sang dêh čar, boh yom phun hră čih akŏ bruă tal anai kiăo tui djop jơlan hơdră, tơlơi pơtrun mơ̆ng ping gah dêh čar tal 14, laih dơ̆ng lăi pơtong hơdôm pok hră pơtrun phun, yom hăng čih ten sa hnơ̆ng mơ̆ng Ding jum kơđi čar pơdjơ̆ nao kơ bruă pơblih hơdră mă bruă amăng kơnuk kơna laih anun lŏn ia amăng rơnuk pơđĭ kyar phrâo. Khua git gai pơ ala mơnuih ƀôn sang dêh čar ơi Trần Thanh Mẫn rơkâo, khua mua pơ ala mơnuih ƀôn sang dêh čar kiăng sem glăi, jŭ yap abih bang, čih pơthâo tum teč rơđah amăng bruă či ngă sa rơwang bruă phrâo, kiăng ngă giong tơlơi phiăn mă bruă, tơlơi phiăn dêh čar pơblih kơtang kiăng lŏn ia đĭ nao pơ anăp; khom thâo hluh rơđah tơlơi phiăn dêh čar khom jing pran kơtang pơtrut lŏn ia pơđĭ kyar.