Mơguah lơ 16/3, Khua git gai Ping gah dêh čar ơi Tô Lâm mă bruă hăng Khul apăn bruă Ping gah ƀôn prong Hải Phòng kơ bruă pơđĭ kyar bơwih ƀong huă-mơnuih mơnam hăng pok pơhai tơlơi pơtrun mơng Jơnum tal XIV mơng Ping gah, tui anun, rơkâo Hải Phòng hrưn đĭ hơbô̆ bruă pơđĭ kyar hluai tui boh than ba glăi, yua boh thâo ia rơgơi hăng pơplih pơčeh phrâo.

Lăi rơđah kơ tơlơi pơmĭn, tơlơi pơtrun mơng Jơnum tal XIV mơng Ping gah, hơdôm tơlơi pơtrun yôm phăn mơng Ding jum kơđi čar hăng hơnong pơkă pơđĭ kyar dua mrô kiăng ngă tong ten amăng jơlan hơdră bruă mă brơi klă hloh, ha amăng plĕ, lăp djơ̆ hăng pơƀuh hăng hơdôm boh than ba glăi sit nik, Khua git gai Ping gah rơkâo, jơlan hơdră bruă mă mơng Hải Phòng kiăng ngă tong ten ƀiă dong, wŏt kơ hrơi mông, pơhlôm tong ten mơnuih ngă, tong ten bruă mă, hrơi mông, djơ̆ bruă mă, tơlơi glăm ba, djơ̆ gơnam, pơlir hăng hơdră pel ĕp, krăo lăng hăng lăng glăi tui tơđar kiăng hmao tlôn pơplih pơkra tơdah kiăng.

Khua git gai Ping gah dêh čar ơi Tô Lâm lăi pơtong, Hải Phòng kiăng pơtrut kơtang amăng bruă tuh tia pơkra ming phrâo, akŏ phun lĕ tuh tia pơkra ming yua boh thâo phrâo, pơkra pơjing hăng tuh tia pơkra ming djru tui tlôn hơmâo dưi đĭ nua kơtang, pơjing glông pơlir tuh tia pơkra ming phrâo, hluai tui bruă ruah klă anom bruă tuh pơ alin, boh thâo măi mok hăng bruă sĭ mơdrô akŏ phun.