Bruă pơkra jơlan rơdêh đuăi hmar Quy Nhơn - Pleiku glông năng ai 125km, găn nao pơ 16 boh să, phường; hơmâo 4 glông rơdêh đuăi, dưi pơđuăi 100km/mông, prăk man pơkra giăm 44.000 klai. Anai jing glông jơlan hơmâo gong gai hăng mơnuih ƀôn sang Gia Lai dŏ tơguan, dŏ čang biă mă, amra nao rai klă hloh, bơwih ƀong đĭ tui mơn, tơlơi hơdip mơnuih ƀôn sang đĭ tui mơn. Yua hnun, bruă pok pơhai ngă jơlan hơmâo mơnuih ƀôn sang ƀơi anih pơkra jơlan tŭ ư biă.

Lu sang anŏ hơmâo lŏn pioh či pơkra jơlan jing jao brơi lŏn laih, kiăng bruă pơkra jơlan gêh găl, dưi ngă tañ. Gong gai hơdôm boh să, phương anih hơmâo jơlan đuăi hmar Quy Nhơn - Pleiku găn nao ăt gir kăng brơi lŏn či pơkra jơlan đah mơ̆ng tañ jao glăi kơ anom bruă man pơkra. Kiăng pơkra jơlan rơdêh đuăi hmar Quy Nhơn - Pleiku khŏm pok rơbêh 942 ha lŏn, prăk duh lŏn rơbêh kơ 4.700 klai.