VOV4.Jarai-Hla gru ƀudah juăt lăi hla kơ mriah rup pơtŭ kơñĭ por đhơ đhet ƀơi bơbung sang plơi Ƀôn Drăng Phôk, să giăm guai dêh čar să Krông Na, tơring glông Ƀuôn Đôn, tơring čar Dak Lak kah hăng rup rap lăng hiam biă mă, pơtogn sit tơlơi dưi ngă pô yôm pơphăn kơ lŏn ia ƀơi guai dêh čar.

Hơdôm pok hla gru dêh čar phrâo along arăng ƀơk brơi kơ mơnuih ƀôn sang brơi pơblih hĭ hla gru sô hơđăp lă laih ia mriah, kiăng kơ hla gru phrâo hiam mriah hur hăng pơtŭ kơñĭ tong krah por đhơ đhet amăng plơi pla kual guai dêh čar. H’Xíu pô čih tơlơi pơhing Gong phun jua pơhiăp Việt Nam čih ră ruai kơ tơlơi anun.

Tŭ mă hla gru dêh čar arăng phrâo ƀơk pơpha brơi, amai H’Ƀô̆ Mlô, dŏ pơ ƀôn Drăng Phôk, să Krông Na, tơring glông Ƀuôn Đôn hok mơak biă mă. Amai H’Ƀô̆ lăi, ñu amra tañ akă hlă hla gru phrâo anai pơhrua kơ hla gru sô hlă lui mơ̆ng thun hlâo lă laih ia mriah. Lu thun rơgao, hla gru dêh čar akă ƀudah hlă gai akă hla gru ƀơi bơbung sang jing bruă mă ngă tui na nao amăng lu thun hăng anai laih hăng djop sang anŏ amăng plơi Drăng Phôk, mah hrơi tơđar hai ƀudah hrơi mơak, ngă lơphet prong kơ dêh čar.

Ƀơk hla gru dêh čar kơ mơnuih ƀôn sang plơi Drăng Phôk

Djop sang anŏ nao amăng glai koh gai ale dlông hăng tơpă glăi ngă gai akă hla kơ pioh hlă ƀơi bơbung, anăp sang pơpŭ hla gru yôm biă mă. Amai H’Ƀô̆ lăi:

“Rĭm thun amăng plơi lêng kơ tŭ mă hla gru hla kơ, sang anŏ tŭ mă hla gru phrâo akă mơtam yơh. Kâo ƀuh mơak biă mă hăng yôm pơphăn amăng pran jua lơ̆m hơmâo tŭ mă hla gru, kah hăng sa tơlơi lăp pơ-ư pơ-ăng biă mă pơtong glăi ngă pô kơ lŏn ia ta”.

Plơi Drăng Phôk lĕ plơi ataih hloh tơring glông Ƀuôn Đôn, plơi anai dŏ klĕp amăng tong krah kual glai Yok Đôn dêh čar ta pơgang, ataih hăng jơlan guai dêh čar gơyut gơyâo Kur giăm 50 km. Plơi anai, hơmâo 140 boh sang anŏ hăng 500 čô mơnuih, amăng anun 86% lĕ mơnuih ƀôn sang djuai ƀiă soh. Ơi Y Tê Ƀuôn Krông, Khua git gai ping gah plơi Drăng Phôk brơi thâo, yua hơmâo ping gah kơnuk kơna tuh pơ alin djru ba anun hơdôm thun giăm anai, ƀô̆ mơta plơi pla hơmâo lu anŏ pơblih phrâo, hiam tui hloh kơ hlâo adih.

Anom bruă tơdăm dra hlăk ai mut phung tơring čar Dak Lak hăng Lâm Đồng ƀơk 150 blah hla gru dêh čar kơ mơnuih ƀôn sang plơi Drăng Phôk  amăng bruă mă Blan klâo ƀơi guai dêh čar thun anai

Biă mă ñu, hăng tơlơi pơtô ba mơ̆ng gong gai kơnuk kơna să, tơring glông, mơnuih ƀôn sang hơmâo tơlơi juăt hiam, akă hăng hlă hla gru, hla kơ ƀơi bơbung sang hăng treng jơlan nao rai dong găn amăng plơi. Sit hơmâo hla gru sô laih, lă ia mriah, mơnuih ƀôn sang mă pơhru hla gru phâo laih anun djă pioh tong ten biă mă.

“Hơdôm hrơi ngă lơphet prong amăng dêh čar hăng hrơi mơak ngă yang thun phrâo tŭ mă hla gru phrâo kiăng mơnuih ƀôn sang akă hla gru phrâo čơkă thun phrâo hăng hơdôm hrơi ngă lơphet prong mơnuih ƀôn sang mơak biă mă pơ-ư pơ-ang kơ djuai ania. Anai lĕ hơdră pơtô pơblang kơ tơlơi khăp kơ lŏn ia laih anun pơ-ư pơ-ang djuai ania, hok mơak hơdor glăi hrơi dưi blah ayăt pơklaih rơngai lŏn ia mơ̆ng anun pơblih tơlơi pơmin hăng tơlơi hơdip mơda mơnuih ƀôn sang klă hloh kơ hlâo”.

Amăng lu bruă mă mơak blan klâo ƀơi guai dêh čar dưi pơphun, Anom bruă tơdăm dra mut phung tơring čar dua boh tơring čar Dak Lak hăng Lâm Đồng hơmâo ƀơk brơi 150 blah hla gru dêh čar, brơi kơ mơnuih ƀôn sang plơi Drang Phôk. Anai lĕ bruă mă mơ̆ng hlăk ai tơdăm dra mut phung dua boh tơring čar kiăng djru pơtô lăi kơ tơlơi khăp kơ lŏn ia, pơtrut pran jua mơnuih ƀôn sang dŏ ƀơi kual dêh čar anăp nao kơ lŏn ia, man pơdong plơi pla ƀơi guai dêh čar jai hrơi pơđĭ kyar pơdrong asah hiam rô̆.

Hơdôm blah hla gru mơnuih ƀôn sang akă hlă ƀơi anăp sang hăng tơlơi pơpŭ yôm

Ayong Y Lê Pas Tơr, Kơ-iăng Khua anom bruă tơdăm dra mut phung tơring čar Dak Lak brơi thâo:

“Ƀing gơmơi hơmâo jao hla gru dêh čar kơ mơnuih ƀôn sang dŏ amăng kual giăm guai dêh čar či să Krông Na. Anai lĕ bruă mă tŭ yua sit nik kiăng pơtrut pran jua mơnuih ƀôn sang ăt đăo kơnang kjăp, hơđong pran jua mă bruă, dŏ dong ƀong huă pioh pơgang guai lŏn ia dêh čar”.

Rup pơƀuh mơ̆ng hlao gru hla kơ por đhơ đhet amăng kual rơhuông adai mơtah mơda lơ̆m glai klô jai ƀuh rơđah tơlơi mơak lăp pơ-ư pơ-ang mơ̆ng rĭm čô mơnuih ƀôn sang dŏ ƀơi jơlan guai dêh čar amăng plơi Drăng Phôk.

Akă hlă hla gru dêh čar ƀu kơnong gru grua hiam bruă ngă tui re se đôč ôh, kiăng pơdah rai pran jua khăp kơ lŏn ia laih anun tơlơi hơdor tơngia kơ ƀing tơhan djai pơsăn drơi jăn kơ lŏn ia yua kiăng kơ lŏn ia ta rơnuk ngă sang rơnang ngă hmua. Mơ̆ng anun, pơtrut pran jua mơnuih ƀôn sang, djop pô, boh nik ñu amăng hlăk ai tơdăm dra khom tuh rơyuh pơyơr pran jua pioh man pơdong hăng pơgang plơi pla dêh čar ta pô.

            H’Xíu HMốc pô čih-Nay Jek: Pơblang