VOV4.Jarai - Jing juăt laih, tơdơi kơ tal pơdơi tết tui phiăn juăt, hlăk ai đơ đam dêh čar glăi hur har nao ngă tơhan ngă tui bruă yôm phăn mơng lŏn ia. Ƀơi tơring čar Daklak, giăm hmâo 3000 čô mơnuih hlăk ai hmâo prăp lui nao ngă tơhan amăng tal bơyan bơnga phrâo Nhâm Dần thun 2022.

Amăng tal ruah ling tơhan anai, hlăk ai Nguyễn Trung Sơn (24 thun, ƀơi ƀut mơnuih ƀôn sang mrô 8, tơring kual Quảng Phú, tơring glông Čư̆ Mgar, tơring čar Daklak hmâo čih hră rơkâo nao ngă tơhan. Sơn lăi pơthâo: Kâo glăk mă bruă mơgăt rơdêh kơ sa bôh anom pơkra gơnam tam ƀơi tơring glông hăng rơnoh prăk blan hơđong 7 klăk prăk sa blan. Samơ̆ hăng tơlơi čang rơmang kiăng ngă ling tơhan hăng bruă gơgrong mơng drơi pô hăng plơi pla, lŏn ia, kâo jiăng jah gah lui bruă bơwih ƀong kiăng nao ngă ling tơhan.

“Kâo ư-ang lom dưi ruah nao ngă tơhan. Kâo amra ngă giong klă hơdôm bruă mă mơng hlăk ai. Kâo thâo lom nao ngă tơhan amra tơpă biă, tơnap biă samơ̆ kâo amra gir run pơhrăm pô klă kiăng djơ̆ pran jua hăng mơnuih hmâo pioh kơ kâo”.

Hlăk ai Daklak ngă hră pơ-ar nao ngă tơhan thun 2022

Lom čih hră rơkâo nao ngă tơhan, hlăk ai Trương Thái Hoàng (25 thun) glăk mă bruă amăng khul hlăk ai phường Ea Tam, plơi prong Buôn Ma Thuột. Hoàng hmâo hrăm giong laih bruă Bơwih ƀong – Sang hră đại học Tây Nguyên, hăng ñu lĕ mơnuih ping gah hlăk ai. Ñu dưi nao ngă tơhan tui pran ñu kiăng pơgang lŏn ia, hrăm tui gru pô ama nao hlâo – sa čô mơnuih mă bruă gah ling tơhan hmâo pơdơi lơtret.

“Hăng bruă gơgrong sa čô hlăk ai hmâo hrăm giong đại học lĕ khom hmâo tơlơi čang rơmang hăng hmâo bruă mă hăng lŏn ia, hăng plơi pla lĕ khom rơkâo mă pô nao ngă tơhan. Amăng hơdôm hrơi ngă ling tơhan khom ngă klă tơlơi pơkă, anih anom hơdip amăng khul ling tơhan kiăng ngă giong bruă hmâo jao, ngă giong bruă mă tañ kiăng tơbiă hyu amăng mơnuih mơnam jing sa mơnuih mă bruă klă hloh”.

Hlăk ai Daklak gum hrom pel ĕp tơlơi suaih pral nao ngă tơhan

Thun 2022, tơring čar Daklak dưi jao ruah 2.977 čô mơnuih nao ngă tơhan. Hơdôm bôh anih anom amăng tơring čar hmâo ngă klă laih bruă ruah ling tơhan, iâu mơnuih nao ngă tơhan, hmâo abih bang djơ̆ tui tơlơi pơkă. Ƀing hlăk ai nao ngă tơhan leng kơ pơhlôm tơhnal pơkă kơ bruă kơđi čar, thun mă bruă, tơlơi suaih pral, bôh thâo hrăm hră. Amăng anun hmâo 60 čô mơnuih hmâo hrăm truh đại học – cao đẳng; 4 čô lĕ mơnuih ping gah, mrô dô̆ glăi leng kơ mơnuih amăng khul hlăk ai; tơdăm djuai ania ƀiă hmâo rơbêh kơ ha mơkrah. Đại tá Lê Văn Hùng, Kơ-iăng Khua git gai ngă rah Khua pơphô bruă Ƀirô git gai khul ling tơhan tơring čar Daklak brơi thâo:

“Khul ruah ling tơhan tơring čar hmâo črâo ba kơ hơdôm anih anom amăng tơring čar ngă tui hơdôm bruă pơphun kơđi čar mơnuih mơnam, gưl ping gah gong gai hơdôm gưl pơphun lăi pơhing, pơtô pơhrăm kơ tơlơi phiăn Ling tơhan ăt kah hăng hơdôm mơta hră pơ-ar pơtô bruă mơng Ding jum, mơng Kual khul ling tơhan. Khul ruah ling tơhan gưl tơring čar truh pơ̆ abih bang hơdôm mơnuih amăng hnưr thun prăp lui ngă ling tơhan. Hrom hăng anun ƀing gơmơi pơphun bruă lăi pơdah rơđah bruă brơi pơdơi hăng hơdôm mơnuih dưi pơdơi, ƀu hmâo ngă ling tơhan. Mơng anun mơ̆ mơnuih ƀôn sang, hơdôm mơnuih amăng hnưr thun nao ngă tơhan pơphun hơdôm yak pel ĕp tơlơi suaih pral kiăng pơphun prăp lui nao ngă tơhan”.

Truh ră anai, abih bang ƀing hlăk ai nao ngă tơhan ƀơi Daklak hmâo tlâ̆o vaccine pơgang Covid-19 2 ară hăng sa dua čô hmâo tlâ̆o ară tal 3. Tui hăng kơčăo bruă, amăng mơguah lơ 16/2, hơdôm anih anom amăng tơring čar Daklak amra ha amăng plĕ ba ƀing hlăk ai nao ngă tơhan, pơhlôm khut khăt hăng sit nik hrơi jơnum ngui mơng hlăk ai djop djuai ania tơring čar Daklak./.

Tuấn Anh: Čih – Siu H’ Prăk: Pơblang