Tui hăng tơlơi lăi pơthâo glăi mơ̆ng Khul hlăk ai tơring čar Dak Lak, amăng 6 blan akô̆ thun anai, hlăk ai đơ đam tơring čar hmâo pơphun ngă tui rơbêh kơ 4.000 ring bruă, črăn bruă hlăk ai hăng abih bang nua ñu ngă kơmlai rơbêh kơ 7 klai 200 klăk prăk.

Rơđah biă ñu, hơdôm gưl khul hlăk ai amăng đơ đam tơring čar hmâo pơdŏng laih 17 bôh sang dô̆ khăp păp, sang dô̆ Khăn Quàng Đỏ; pơkra 17km gŏng hrĕ apui pơčrang rơđah jơlan glông amăng plơi pla, 23 kual ngui ngor kơ čơđai muai; djru lu kơtu hơdrôm hră kơ čơđai muai; pik ping tuir, pơkra ming hơdôm pluh bôh sang jơnum bôh thâo, sang jơnum plơi pla. Hơdôm ring bruă “Hrơi năm gum djru”, “Hrơi tơjuh mơtah đơ đam dêh čar” dưi pơphun bruă mă, ngă pơhưč lu mơnuih amăng khul hlăk ai, tơdăm dra gum hrŏm hăng bruă pơgang rơhuông adai lŏn mơnai, bŏng glăi hăng pơplih ayuh hyiăng ƀơi hơdôm bôh plơi pla. Hơdôm gưl khul hlăk ai đơ đam tơring čar hmâo ƀơk laih rơbêh kơ 20 rơbâo anung gơnam, giăm truh 3.000 anung prăk djru hrăm hră, rơdêh dang wang kơ mơnuih ƀôn sang, čơđai muai; pơphun pel ĕp pơjrao tơlơi ruă brơi đôč kơ mơnuih ƀôn sang ƀơi hơdôm anih anom kual asuek, ataih. Abih bang nua hơdôm bruă gum djru lĕ rơbêh kơ 10 klai prăk. Amai H’ Giang Niê, Khua git gai Khul hlăk ai tơring čar Dak Lak lăi.

 “Hrŏm hăng bruă pơphun raih daih rim bruă mă lĕ kơplah wah hơdôm gưl khul hlăk ai hmâo tơlơi pơkĕ hrŏm. Bơ̆ hăng gưl tơring čar lĕ ƀing gơmơi hơneč mă pơsur đut hlah tơlơi đing nao gum djru mơ̆ng hơdôm phun akha sang bruă, grŭp pioh pơsur nao pơ̆ kual phara ha jăn mơ̆ng hơdôm bôh tơring čar Dap Kơdư. Anun hơdôm bruă mă gum djru dưi nao djơ̆ jơlan gah phun, đing nao bruă pơdŏng plơi pla phrâo, plơi prong klă hiam. Hơdôm črăn bruă lĕ đing nao pơplih hơdră mă bruă pioh pơdah rơđah sit nik hloh”.

Ƀơi tơring čar Kon Tum, ngă tui bruă ba jơlan hlâo, gum djru, bruă pơčeh phrâo mơ̆ng hlăk ai, mơ̆ng akô̆ thun truh ră anai hlăk ai tơring čar hmâo gum hrŏm klă bruă pơdŏng pơkra, črăn bruă djru ngă giong bruă kơđi čar, bruă pô juăt mă hăng gum hrŏm pơđĭ kyar bơwih ƀong – mơnuih mơnam. Ayong A Xây, Kơ-iăng Khua git gai Khul hlăk ai tơring čar, Khua Khul pơlir hơbit hlăk ai dêh čar Việt Nam tơring čar Kon Tum, brơi thâo:

 “Kiăng pok pơhai ngă tui ba glăi bôh tơhnal prong hloh, Grŭp apăn bruă Khul hlăk ai tơring čar Kon Tum hmâo pel ĕp glăi, pơplih phrâo abih bang hơdôm akô̆ bruă pioh pok pơhai ngă tui amăng blan 3 Blan hlăk ai. Pơhrăm hơdôm jơlan gah bruă pơsir, bôh yôm bơdjơ̆ nao truh pơplih mrô kiăng pơtô glăi bôh thâo phrâo, hơdră phrâo kơ khul hlăk ai hăng biă ñu ba mut kual asuek, ataih, kual djuai ania ƀiă”.

Khul hlăk ai tơring čar Gia Lai ăt phrâo pơphun mơn jơlan hơdră klah čun 3 thun pơdŏng hăng pơhư prong hơdră pơplih phrâo amăng bruă Grŭp hăng bruă hlăk ai tơdăm ngek dra muai, čơđai muai tơring čar Gia Lai hăng bơni Hlăk ai pơplih phrâo ngă tui tơlơi Wa Hồ thun 2023. Tlâo thun rơgao, hơdôm gưl Khul – Grŭp amăng đơ đam tơring čar Gia Lai hmâo đing nao, pơtrut kơtang hơdôm jơlan gah pơtô pơhrăm phiăn juăt ngă hơkrŭ, pran jua khăp kơ lŏn ia, pơtô juăt pran jua, jơlan gah hơdip tâ̆o yâo kơ hlăk ai tơdăm ngek dra muai, čơđai muai. Khul hlăk ai tơring čar Gia Lai hmâo pok pơhai laih bruă pơsur “Rim hrơi sa tơlơi pơhing klă, rim rơwang hrơi tơjuh sa tơlơi ruai klă hiam” amăng plăng face book, thâo ƀuh hăng bơni 27 čô mơnuih ngă gru “mơnuih klă, bruă klă” amăng khul hlăk ai, tơdăm dra.

Ngă tui Tơlơi črâo ba mrô 05 kơ “Pơtrut kơtang hrăm hăng ngă tui tơlơi pơmin, pran jua, kơnuih Hồ Chí Minh”, Grŭp apăn bruă Khul hlăk ai tơring čar Gia Lai hmâo đing nao pok pơhai bruă hrăm hăng ngă tui tơlơi pơmin, pran jua, kơnuih Hồ Chí Minh, lăng anai lĕ bruă mă phun, na nao amăng djop bruă mơng Khul hlăk ai. Rơgao kơ pok pơhai, hmâo laih lu gru ba jơlan hlâo bôh thâo, hur har, yak rơgao pơdŏng bruă mă, djă pioh hơđong rơnuk rơnua bruă kơđi čar, yua kơ tơlơi hơdip rơnuk rơnua mơ̆ng mơnuih ƀôn sang, pơdŏng plơi pla phrâo. Hrưn đĭ pơ̆ anăp anai pơtrut kơtang dong bruă bơkơtưn khăp kơ lŏn ia, ba jơlan hlâo gum hrŏm pơđĭ kyar bơwih ƀong – mơnuih mơnam. Jing sa amăng hơdôm mơnuih thâo bruă hmâo bơni Hlăk ai pơplih phrâo ngă tui tơlơi Wa, hăng čơkă mă hră bơni mơng Jơnum min mơnuih ƀôn sang tơring čar Gia Lai, ayong Nay Wing, Khua git gai Khul hlăk ai tơring glông Čư̆ Sê, lăi:

 “Hrơi anai kâo mơ-ak lĕ ư-ang, pơ̆ anăp anai amra hmâo hơdôm bruă mă phun, pơplih phrâo truh mơnuih amăng khul tơdăm dra kiăng djă pioh, ngă tui hmâo hơdôm bôh than prong hloh dong. Ta amra jing pô ba jơlan hlâo djop mơta bruă pioh ngă gru kơ hlăk ai amăng khul tơdăm dra. Kơtưn lăi pơhing, pơsur mơnuih amăng khul lăi pơthâo pơtô pơhrăm tơlơi phiăn, pơhlôm hơđong jơlan nao rai, ngă gal brơi pioh hlăk ai dưi čan prăk, pơsir bruă mă, kơtưn prăk pơhrui glăi pioh pơhlôm hơđong tơlơi hơdip mơda”.

Djă pioh tơlơi gum hơgôp mơ̆ng hlăk ai tơring čar, Khua Jơnum min mơnuih ƀôn sang tơring čar Gia Lai hmâo ƀơk laih hră bơni kơ 6 grŭp hăng 10 čô mơnuih yua kơ hmâo bôh than prong amăng pơdŏng hăng pơhư prong hơdră pơplih phrâo amăng bruă Khul hăng bruă hlăk ai tơdăm ngek dra muai, čơđai muai tơring čar Gia Lai. Grŭp mă bruă Khul hlăk ai tơring čar Gia Lai ăt ƀơk mơn hră bơni 75 čô mơnuih hlăk ai ngă gru pơplih phrâo ngă tui tơlơi Wa thun 2023./.