Ƀơi mông jơnum, ƀing pơ ala nao jơnum hơmâo lăi pơthâo tơlơi hơmâo sit nik, yua mơ̆ng mơta tơlơi ba truh, tơlơi ƀu bơkơnar plah wah đah kơmơi hăng đah rơkơi ƀơi plơi pla, anun yơh ngă kơ anŏ pơmin dŏ kah pơpha hơmâo hlâo hăng gru pơkă mă pơmin nao kơ ha bơnah đah rơkơi ƀudah đah kơmơi. Yua kơ anun, hơdôm tơlơi pơmin ƀu bơkơnar anun, tơlơi thâo ƀuh sit nik čih pioh, ƀing hlăk ai lăi hrŏm, hlăk ai mơnuih djuai ƀiă lăi pha kiăng jing ƀing hrup tơhan ba gru hlâo amăng bruă hyu pơtô lăi, pơblang rơđah, kiăng pơblih tơlơi pơmin, tơlơi thâo hluh mơ̆ng pô hăng hơdôm mơnuih jum dar pơmin nao kơ tơlơi bơkơnar đah rơkơi hăng đah kơmơi. Čơđai sang hră gưl prong, Triệu Thị Nhung, djuai ania Yao (Dao) Sang hră gưl prong hrăm bruă ngă nai pơtô-Sang hră gưl prong Đà Nẵng lăi:

"Ƀơi plơi pla gơmơi ăt dŏ đôč tơlơi pơmin sit đah kơmơi hrăm giong sang rhă gưl dua ƀudah anih prong gưl klâo lĕ dŏ pơ sang đôč pioh mă bruă hmua ƀudah dŏ rơkơi tơkeng ană bă yơh. Lu mơnuih prong tha rơma pơmin tui anun, lăi đah kơmơi hrơi mah hrăm anih prong dơ̆ pă hai, kơñ pơgi dŏ rơkơi hơmâo ană ăt ƀu hơmâo djru hơgĕt lơi kơ sang anŏ ta pô. Yua kơ anun lu amĭ ama juăt brơi ană bă đah kơmơi khom dŏ rơkơi tañ laih anun pơdơi hrăm hră. Kâo pơmin pơ kual plơi pla gơmơi ƀing hlăk ai khom pơmin phara ƀiă kiăng pơblih hĭ tơlơi pơmin hơđăp dŏ pơlŭk đơi djơh hăng anun”.

Lu khua mua, ƀing nao pơhmư̆ jơnum lăi, kiăng pơblih hĭ tơlơi  pơmin ƀu klă kah pơpha kơnuih đah rơkơi hăng đah kơmơi laih anun anŏ pơmin sa hnơ̆ng kơ đah kơmơi hăng đah rơkơi, kiăng ĕp lu phun tơdŭ, anŏ pơtô hrăm, jơlan hơdră truh pơ gru grua hiam amăng mơnuih mơnam. Amăng anun kiăng kơtưn pơtô hrăm ngă bơkơnar pơmin nao kơ đah kơmơi hăng đah rơkơi amăng sang hră, pơtô hrăm pơtlep hăng lu hơdră pơhrăm kah hăng pơtrut pơsur ƀing tơdăm dra čơđai sang hră gưl prong mut hrŏm khul grup mơnuih tơpuôl, djru hrŏm bruă mă amăng mơnuih mơnam. Mơ̆ng anun kiăng pơđĭ tui tơlơi thâo hluh pơsir hĭ hơdôm tơlơi pơmin mơ̆ng hơjăn drơi jăn pô ăt kah hăng djru kơ bruă pơtô pơblang ană plơi pla. Yă Hoàng Thị Hạnh, kơ-iăng khua hơđăp ding jum, Jơnum min djuai ania lăi lĕ, hlăk ai mơnuih djuai ƀiă khom thâo hluh kơ mơnuih ƀôn sang, gru grua hiam mơ̆ng djuai ania pô. Gơñu amra hơmâo hơdră ngă gêh găl rim yak ngă tui pơtrut đuăi hĭ, lom lui tơlơi pơmin kah pơpha lăng ba đah rơkơi hăng đah kơmơi, pơmin mă sa hnơ̆ng.

“Tơlơi gơgrong yôm biă sit hlăk ai pô pơphun bruă mă kiăng pơtô pơblang hăng tơlơi adoh đưm djuai ania, hăng tơlơi ayun suang; hăng lu mơta bruă mă khul grup jơnum bruă amăng plơi pla, djuai ania pô laih anun lir hơbit hăng djuai ania pơkŏn; Hrăm tui lu hơbô̆ bruă phrâo klă hloh, amăng anun khom pơmin djơ̆ bơkơnar đah rơkơi hăng đah kơmơi hăng anŏ bơlang ba tơpă, lui hĭ abih anŏ kah pơpha bơlăng ba đah kơmơi hăng đah rơkơi, lŏm lui anŏ ñu yak kơdŭn glăi pơ klôn”.

Pơhiăp amăng mông jơnum pơčrong, Kơ-iăng Khua khul đah kơmơi mut phung Việt Nam, yă Nguyễn Thị Thu Hiền lăi: Jơnum bơkơtuai anai mông gêh găl kơ abih bang ƀing khua mua, ƀing čơđai sang hră gưl prong, hlăk ai tơdăm dra pơčrong sai, kah pơpha nao rai, pơđing hmư̆, čih pioh hơdôm tơlơi pơhing tŭ yua, bơwih brơi bruă mă kơ ta, laih dơ̆ng djru pơđĭ kyar bruă mă mơ̆ng ta pô hăng pơgôp hrŏm brơi mơnuih tơpuôl. Hăng Khul đah kơmơi mut phung Việt Nam laih anun djop anom bruă pơdjơ̆ nao, anai ăt jing mông lăng glăi lu hloh tơlơi gơgrong ba mơ̆ng hlăk ai, tơdăm dra čơđai sang hră gưl prong gum hrŏm ngă bơkơnar anŏ lăng ba đah rơkơi hăng đah kơmơi. Tui hăng yă Nguyễn Thị Thu Hiền, bruă lui hĭ tơlơi pơmin kah anŏ bơlăng ba đah kơmơi hăng đah kơmơi, kiăng hơmâo tơlơi djru ba, ngă gêh găl mơ̆ng lu sang bruă, pơtrut tui ƀing hlăkai tơdăm dra ngă tui anŏ kiăng mơ̆ng ƀing gơñu.

“Kiăng biă mă Ding jum Pơtô hăng Pơjuăt amra pơtrut tui bruă mă pôr tơlơi pơhing, pơđĭ tui tơlơi thâo hluh, pơphun lu bruă mă gah rơngiao kiăng pơtô ba, tơlơi thâo hluh tong ten bơkơnar bruă lăng ba rơkơi hăng bơnai, brơi ƀing hlăk ai tơdăm dra čơđai sang hră gưl prong, amra jing khul mơnuih mă bruă na hlâo, ba akŏ lui hĭ tơlơi kah đah kơmơi hăng đah kơmơi tơlơi bơlang ba, pơpŭ mă ha bơnah, mơ̆ng anun pơtrut abih bang bơlăng ba bơkơnar soh rơkơi hăng bơnai”.

Jơnum anai do amăng Bruă mă gru grua laih anun jak iâu pơtrut ngă tui bơkơnar rơkơi bơnai hăng akŏ ñu “Hlăk ai djuai ƀiă nao hlâo pơblih tơlơi pơmin bruă mă bơlăng pleh ploh rơkơi bơnai yua kiăng pơđĭ kyar”. Hơdôm bruă mă pơphun anai amăng Kơčăo bruă 8 Ngă tui anŏ bơkơnar rơkơi bơnai hăng pơsir hĭ hơdôm bruă mă či kiăng biă mă hăng ƀing đah kơmơi hrơi laih anun čơđai muai gah hơdră tơhnal pơkă mơ̆ng dêh čar pơđĭ kyar bơwih ƀong huă mơnuih mơnam kual djuai ƀiă hăng čư̆ siăng mơ̆ng thun 2021-2030. Ƀing čơđai sang hră gưl prong nao jơnum hrŏm anai lĕ jing ƀing ba gru hlâo pơplih tañ tơlơi pơmin lăng ƀu bơkơnar đah rơkơi, đah kơmơi amăng sang anŏ, amăng plơi pla, lŏm lui mơtam tơlơi phiăn pơkă pơpŭ kơ đah rơkơi hloh kơ đah kơmơi ƀudah pơpŭ kơ đah kơmơi hloh kơ đah rơkơi. Rim čô čơđai sang hră amra jing pô hyu pơtô lăi klă hiam, hơmâo tơlơi pơčeh phrâo, hơdră ngă bruă hiam, pơđĭ tui tơlơi thâo hluh kơ anŏ bơkơnar đah kơmơi hăng đah rơkơi, pơtruh brơi kơ gơyut gơyâo, sang anŏ hăng ƀing čơđai rơnuk tơdơi….djru hrŏm pơtrut lu hloh kơ tơlơi bơkơnar rơkơi hăng bơnai ƀơi kual plơi pla mơnuih ƀôn sang djuai ƀiă hăng čư̆ siăng.