Adơi Nguyễn Đức Danh (hrăm anih 12A1, Sang hră gưl 3 Lương Thế Vinh, tơring glông Kbang, tơring čar Gia Lai) jing sa amăng 8 čô hlăk ai hmư̆ hing rơgơi mơbruă mơ̆ng Gia Lai thun 2023. Ƀơi sang hră, ñu hơmâo 4 mơta tơlơi kơsem min boh thâo kĭ thuâ̆t lêng kơ hơmâo mă pri yôm. Amăng anun, kơsem min mă yua AI amăng bruă krăp lăng, wai lăng sang hră dưi mă pri sa tơlơi pơplông hlăk ai rơgơi tin học tơring čar Gia Lai tal 22 thun 2023, pri dua amăng tơlơi pơplông tin học pioh kơ hlăk ai kual Tong krah - Dap Kơdư hăng mă pri pơtrut pơsur đơ đam dêh čar. Adơi Nguyễn Đức Danh ăt jing mơnuih hmư̆ hing amăng bruă hrăm hăng hla tui tơlơi pơmin hiam mơ̆ng Hồ Chí Minh ƀơi tơring čar Gia Lai:“Hăng tơlơi gơgrong jing sa dong kơna apăn bruă git gai khul hlăk ai sang hră, kâo lêng kơ gir ngă djŏp bruă hơmâo ba tơbiă. Jing sa čô čơđai kâo pơsit bruă hrăm hră jing bruă yôm hloh. Dưi hrăm klă, hơmâo hră apah bơni, jing čơđai rơgơi Wa Hồ lĕ bruă ngă sit nik hloh, yôm hloh, kiăng pơ anăp anai dưi gum pơgôp kơ lŏn ia”.

Ăt hur har pran jua gum djru ngă bruă, amai Nguyễn Hoài Phương - Khua hlăk ai rơnuk Hồ Chí Minh tơring glông Čư̆ Păh, tơring čar Gia Lai hrŏm hăng hlăk ai man pơdong plơi pla phrâo hăng djru ba mơnuih ƀôn sang. Amăng anun hmư̆ hing lĕ jơlan nao rai hơmâo hlăk ai dưm pơkra apui tŭi rơđah hăng camera krăp lăng ƀơi plơi Phung, să Ia Mơ Nông. Hrŏm hăng anun dong hơmâo 5 boh sang khăp pap wơ̆t hăng lu hơbô̆ bruă djru ba ƀing čơđai drit druai djuai ania biă. Amai Nguyễn Hoài Phương brơi thâo:“Jing sa čô mơnuih git gai hlăk ai, kâo lêng kơ pơmin kơjăp hrăm tui Wa mơ̆ng hơdôm bruă anet hloh, amuñ hloh. Hrơi blan rơgao, kâo hrŏm hăng hlăk ai gum ngă rơbêh 550 mơta bruă, ring bruă yua hlăk ai pơphun, hăng nua ñu rơbêh kơ 8 klai 500 klăk prăk. Gơmơi pơmin anun lĕ tơlơi gêh gal kiăng hlăk ai hơmâo hrăm, pơtŏp bruă, gum djru kơ lŏn ia hăng kơjăp tơlơi pơmin”.

Mơ̆ng thun 2021 truh ră anai, tơring čar Gia Lai hơmâo 235 čô hlăk ai hơmâo pơpŭ bơni jing hlăk ai ngă tui tơlơi Wa Hồ pơtô. Ayong Đỗ Đức Thanh - Kơ-iăng khua khul hlăk ai Hồ Chí Minh tơring čar Gia Lai brơi thâo, amăng hơdôm tal bơkơtưn ngă bruă kah hăng: hlăk ai hur har gum djru, hlăk ai pơčeh phrâo, hlăk ai kơsung pơ anăp pơgang ba Lŏn ia, hlăk ai pơphun bơwih ƀong...lu biă hlăk ai gum djru, pơyơr pran jua, kơsung nao pơ anăp amăng bruă hrăm hră, mă bruă, pơđĭ kyar bơwih ƀong huă - mơnuih mơnam.

“Bruă pok prong mơnuih rơgơi mơbruă hmư̆ hing, hơdră ngă bruă djơ̆ jing sa amăng hơdôm bruă hơmâo ngă re se. Ƀing gơmơi hơmâo sa akŏ bruă pok prong hơƀô̆ bruă anai, biă ñu lĕ pơtrut hrăm hăng hla tui tơlơi pơmin hiam mơ̆ng Hồ Chí Minh. Mơ̆ng anun pơtrut pơsur abih bang hrăm nao rai tơdruă, jing hlăk ai rơgơi mơbruă ba jơlan gum djru kơ mơnuih ƀôn sang”.

Mơ̆ng bruă pôr pơhing sit nik, pơtrut hrăm hăng hla tui tơlơi pơmin, pran jua hiam mơ̆ng Hồ Chí Minh kơ hlăk ai ƀơi tơring čar hrơi blan rơgao, Khul apăn bruă git gai hlăk ai tơring čar Gia Lai pơsit hơdôm hơdră pơđĭ tui anŏ klă mơ̆ng bruă hrăm hăng hla tui Wa Hồ amăng hrơi blan pơ anăp. Rim thun čih pơkra akŏ bruă tui tơlơi jao mơ̆ng tơring čar, pơphun jơnum kơđi čar hăng anăn “Hơdor kơ Wa - Pran jua ta bang bơngač hloh” ƀrô hrơi tơkeng Wa Hồ. Pơphun ngă jơlan hơdră “Tŭi rơđah bơngač tơlơi kiăng khăp hlăk ai Việt Nam”, pơpŭ kơ hlăk ai ngă tui tơlơi Wa pơtô djŏp gưl, pơpŭ kơ hlăk ai rơngơi amăng djŏp bruă mă. Pơtrut iâu pơthưr “Rim hrơi sa tơlơi hmư̆ hing hiam, rim wơ̆t hrơi tơjuh sa tơlơi ră ruai hiam” ƀơi glông pôr pơhing, fanpage mơ̆ng djŏp gưl khul grup hlăk ai. Pơƀut ngă akŏ bruă mơ̆ng Khul apăn bruă git gai hlăk ai tơring čar kơ bruă pok prong gru kơnuih hiam, tơlơi ră ruai hiam hrăm hăng hla tui tơlơi pơmin, pran jua mơ̆ng Hồ Chí Minh mơ̆ng anai truh pơ thun 2027./.