Ƀơi anih djă pioh gru grua ngă hơkrŭ Ping gah tơring čar Kon Tum ƀơi să Măng Ri, tơring glông Tu Mơ Rông, rơbêh 100 čô hlăk ai mơng hơdôm anom bruă: Khul hlăk ai tơring čar Kon Tum, Sư đoàn 10, anom bruă git gai ling tơhan tơring čar, Anom bruă git gai tơhan wai pơgang guai tơring čar hăng kông ang tơring čar hơmâo nao tŭi ñang, dưm guang bơnga pơdah pran jua pơpŭ, hơdor tơngia ƀing mơnuih sông kơtang djai pơsăn drơi.

Ƀrô tal anai ƀơi plơi Mô Po, să Mường Hoong, tơring glông Đăk Glei, hlăk ai 5 anom bruă ling tơhan tơring čar Kon Tum ăt hơmâo jao ring bruă “Jơlan hlăk ai rơđah bơngač” brơi 30 boh sang anŏ djuai ania Sêdang. Ring bruă hơmâo 28 apui kơđen hrĭp pơ-iă yang hrơi nua ñu 50 klăk prăk djru brơi mơnuih ƀôn sang gêh gal lơm đuăi nao rai amăng jơlan mơmŏt mlăm.