VOV4.Jarai - Mơguah lơ 7/3, ƀơi tơring kual Plây Kần, tơring glông Ngọc Hồi, Grŭp apăn bruă Khul hlăk ai tơring čar Kontum pơphun ngă lơphet pok phun Blan hlăk ai hăng Jơlan hơdră Blan 3 guai lŏn ia – Guai lŏn ia Kâo thun 2022.

Ƀơk hră Hlăk ai hăng Miđai hlăk ai kơ mơnuih phrâo mut khul

Amăng mông ngă lơphet, Grŭp apăn bruă Khul hlăk ai tơring čar Kontum iâu pơthưr mơnuih apăn bruă, hlăk ai amăng khul, tơdăm ngek dra muai čơđai muai amăng blan 3 – Blan hlăk ai thun 2022 ngă tui pran jua ba jơlan hlâo, gum djru mơng hlăk ai gơgrong, pơdŏng hơdôm ring bruă, črăn bruă hlăk ai čơkă mơ-ak Jơnum khul hlăk ai hơdôm gưl hăng 91 thun Hrơi pơdŏng Khul hlăk ai rơnuk Hồ Chí Minh; ngă tui ba glăi bôh tơhnal hơdôm bruă pơgang pơgăn klin Covid-19; hơđong tơlơi hơdip mơnuih mơnam; “Mơñum ia hơdor kơ pô klơi – Hơdor tơngia”; hơdôm bruă mă djru hlăk ai pơphun bruă mă; bơwih brơi mơnuih amăng khul, tơdăm dra, čơđai sang hră, ƀing hrăm gưl dlông, čơđai muai tơnap tap...

Ƀơk anung gơnam kơ hlăk ai tơnap tap

Tal anai Khul hlăk ai hăng Khul đah kơmơi Ding jum Kông ang ƀơk brơi 10 hơdră pơđĭ kyar bơwih ƀong hmâo 1000 drơi mơnŭ pioh rông mă bôh kơ 10 bôh sang anô̆ gah hơdră bruă gum djru, sang anô̆ tơnap tap, mơnuih apăn bruă khul đăo amăng kual djuai ania ƀiă dô̆; khul đăo; hrom hăng lu anung gơnam brơi kơ čơđai sang hră tơnap tap kual guai lŏn ia tơring čar Kontum./.

Siu H’ Prăk: Pơblang