VOV4.Jarai - Anăp nao Akô̆ bruă “Pla sa klai ƀĕ phun kyâu rơwang 2021-2025” mơng Khua dêh čar, mơguah lơ 4/7 ƀơi jơlan bĕ čun čue Măng Đen ƀơi jơlan 24, črăn gah tơring kual Măng Đen, tơring glông Kon Plông, Grŭp apăn bruă Khul hlăk ai tơring čar Kontum pơphun pla kyâu dua bơnah jơlan pơjing anih anom hiam hăng pơgang anih anom dô̆.

Khua git gai Ping gah tơring čar, Khua Khul pơ ala mơnuih ƀôn sang tơring čar Kontum gum hrom pla kyâu hăng khul hlăk ai

Amăng mơguah mơtăm, rơbêh kơ 300 čô mơnuih apăn bruă, mơnuih mă bruă mơng khul hlăk ai gum hrom mơnuih ƀôn sang dua bôh tơring glông Kon Braih hăng Kon Plông, tơring čar Kontum hmâo pla laih ha rơbâo phun kyâu hngô 3 pok hla rôk tui kơtuai 2 bơnah jơlan bĕ čun čue Măng Đen. Hăng Jơlan gah rim gưl khul sa ring bruă pla kyâu, mơng thun 2020 truh ră anai kơnong ƀơi jơlan bĕ čun čue Măng Đen, Grŭp apăn bruă Khul hlăk ai tơring čar Kontum hmâo gum hrom hăng hơdôm anom bruă bơdjơ̆ nao pơphun 3 tal bruă mă, pla hmâo giăm truh 20.000 ƀĕ phun kyâu hngô 3 pok hla pơjing anih anom hiam hăng pơgang anih anom dô̆./.

Siu H’ Prăk: Pơblang