VOV4.Jarai - Mơmot lơ 24/7, Grŭp apăn bruă Khul hlăk ai tơring čar Kontum pơphun ngă Lơphet “Tuĭ apui hlin hơdor glăi ƀing Ling tơhan pơsăn drơi”. Anai lĕ sa amăng lu bruă mă mơng hlăk ai Kontum ƀrô djơ̆ tal hơdor glăi 75 thun Hrơi pioh kơ Ling tơhan rơka ruă hăng pơsăn drơi lơ 27/7. Mông ngă Lơphet “Tuĭ apui hlin hơdor glăi ƀing Ling tơhan pơsăn drơi” dưi hmâo Grŭp apăn bruă Khul hlăk ai tơring čar Kontum pơphun ƀơi dua anih anom phun lĕ Pơsat ling tơhan pơsăn drơi tơring čar hăng Sang hơdor kơ ling tơhan pơsăn drơi Sư đoàn 10 ƀơi plơi prong Kontum.

Mơnuih hlăk ai plơi prong Kontum tuĭ apui hlin hơdor kơ ƀing ling tơhan pơsăn drơi

Hrom hăng anun ƀơi 47 ring bruă čih hơdor pioh ling tơhan pơsăn drơi ƀơi 10 bôh tơring glông, plơi prong mơng tơring čar, hơdôm rơbâo čô mơnuih amăng khul hlăk ai, tơdăm dra 102 bôh să, phường, tơring kual ăt ha pran pơphun ngă Lơphet tuĭ ñang, pơpŭ bơnga hăng gum hrom tuĭ đĭ rơbêh kơ 7000 ƀĕ apui hlin pơdah pran jua hơdor tơngia dơlăm ƀing ling tơhan pơsăn drơi yua kơ tơlơi rơngai mơng lŏn ia.

Hlăk ai khul ling tơhan tuĭ apui hlin hơdor kơ ƀing ling tơhan pơsăn drơi

Ră anai tơring čar Kontum hmâo 7.479 bôh pơsat tơhan pơsăn drơi dưi dor ƀơi 10 bôh pơsat ling tơhan pơsăn drơi amăng tơring čar. 5 thun rơgao hơdôm bôh anom tơhan mơng tơring čar hmâo tum pơƀut tơlang tơleh 233 čô ling tơhan pơsăn drơi. Đơ đam tơring čar ră anai hmâo 49 ring bruă čih hơdor pioh ling tơhan pơsăn drơi, amăng anun hmâo 10 bôh pơsat ling tơhan pơsăn drơi, 36 bôh anih čih anăn hơdor kơ ling tơhan pơsăn drơi hăng 3 Gŏng kut hơdor kơ ling tơhan pơsăn drơi./.

Siu H’ Prăk: Pơblang