Hăng anăp ngă bruă “ Iâu pô hlơi, drơi pơpă djơ̆ mơtam” thun 2024, Khul iâu mut tơhan djop gưl ƀơi tơring čar Lâm Đồng hơmâo pơphun sem lăng, ruah, kah pơpha pioh ruah mă ƀing hlăk ai tơdăm dra tŭ yua hloh mut ngă tơhan, kiăng djop rơnoh, djơ̆ anŏ pơkă hăng lăp hăng bruă akŏ pơjing bruă khul ling tơan amăng rơnuk phrâo. Amăng anun, hlăk ai hơmâo tơlơi suaih pral hnong 1 hăng hnong 2 dưi djop truh 64%; mrô hlăk ai hrăm giong anih 12 pơngŏ hơmâo 36%; hrăm bruă gưl ƀrô, hrăm ngă nai hăng hrăm gưl prong lĕ 7,5%.

Amăng mrô anai, hơmâo 22 čô tơhan phrâo lĕ mơnuih ping gah laih, giăm 34% mrô tơhan lĕ ană amôn mơnuih djuai ƀiă. Hrŏm hăng ƀing hlăk ai mut ngă tơhan, nao ngă tơhan dŏ mă bruă ƀơi djop anih pơpha nao, tal anai ƀing tơdăm dra hur har tơring čar Lâm Đồng hăng djop tơring glông, plơi prong amăng tơring čar nao pơyơr pŏ bơnga bơni hơ-ơč, pơtrut pran jua ƀing tơhan phrâo mut, kiăng djă bong kjăp pran jua khin hơtai mơ̆ng djuai ania, kiăo tui kru anong wa ama ơi đưm hlâo wai pơgang lŏn ia. Hlâo kơ anun, djop tơring glông ƀơi Lâm Đồng ăt pơphun jơnum mơak hrơi mut tơhan, nao čuă jơmư, pơtrut pran jua hăng ƀơk gơnam kơ ƀing mut ngă tơhan.