Amăng 5 thun rơgao, djop gưl khul hlăk ai tơring čar Dak Lak hơmâo djru brơi 152 akŏ bruă pơphun bơwih ƀong mơng hlăk ai; pơjing giăm 300 hơbô̆ bruă gum djru hlăk ai tơnap tap; črâo ba, ĕp brơi bruă mă brơi 27.000 čô hlăk ai. Bruă gum pơgôp, tum pơƀut hlăk ai anăp nao kual mơnuih djuai ania ƀiă, mơnuih tui đăo. mơng anun, pơmut dong rơbêh 92.600 čô hlăk ai amăng khul, pơđĭ kyar 15 khul grup amăng anom bơwih ƀong sĭ mơdrô gah rơngiao kơnuk kơna.

Hlăk ai đơ đam tơring čar ăt gir run mut hrŏm amăng hơdôm bruă djru mơnuih mơnam, gum djru yua kơ abih bang mơnuih. Amăng 5 thun rơgao hơmâo jak iâu gum pơgôp djru man pơdong phrâo 72 boh sang khăp pap; pơphun 290 wŏt khăm pơjrao, črâo ba hăng ƀơk jrao, pơyơr rơbêh 37.400 anung drah jôr brơi mơnuih duam ruă.