Tơdơi kơ hmâo hơdră pơtrun mơ̆ng Jơnum min mơnuih ƀôn sang tơring čar, hơdôm thun rơgao, gơnong bruă tuai čuă ngui tơring čar Lâm Đồng hmâo gum hrŏm hăng hơdôm bôh anom pơphun pel ĕp hăng tŭ yap 33 bôh anih anom tuai čuă lăng đang hmua. Khă hnun hai, yua kơ bưp lu tơlơi gun amăng tơlơi pơkă mơ̆ng tơlơi phiăn mă yua ră anai, ba truh bruă pơđĭ kyar tuai čuă lăng đang hmua ƀơi tơring čar Lâm Đồng bưp lu tơlơi tơnap.

Pơhiăp amăng mông jơnum, ơi Phạm S, Kơ-iăng Khua Jơnum min mơnuih ƀôn sang tơring čar Lâm Đồng pơtŏng sit: Kiăng pơtrut tuai čuă lăng đang hmua pơđĭ kyar kơtang, hmâo tơhnal pơplih phrâo pơ̆ anăp anai, tơring čar glăk črâo ba hơdôm bôh ƀirô apăn bruă čih pơkra rơwang bruă mă yua lŏn kơ tuai čuă lăng đang hmua nao hrŏm hăng hơdôm tơlơi pơkă rơđah lăi pơthâo kơ gưl hmâo tơlơi dưi pơsit. Bruă anai ngă tui hluai tui Tơlơi phiăn pơkă kơ lŏn drŏn thun 2024 hăng hơdôm hră pơ-ar pơkă rơđah ngă tui hmâo bơdjơ̆ nao./.