Rơwang bruă rơgao, Jơnum min djop djuai ania mơnuih mơnam dêh čar Việt Nam hơdôm gưl hmâo pơphun ngă tui klă bruă lăng tui hăng lăi glăi mơnuih mơnam. Lu bôh yôm lăng tui mơ̆ng Jơnum min djop djuai ania mơnuih mơnam dêh čar Việt Nam hmâo ba glăi laih bôh tơhnal klă djru kơ ƀirô hmâo tơlơi dưi hmao tlôn pơtlaih tơnap, akă gal; ba tơbiă ngă giong hơdră pơkă, hơdră bruă; djơ̆ tui tơlơi čang rơmang, pơgang tơlơi dưi, bôh tŭ yua djơ̆ phiăn, lăp djơ̆ mơ̆ng mơnuih ƀôn sang.

Să Minh Khai, tơring glông Hoài Đức, ƀôn prong Hà Nội... Abih bang kual lŏn pơhrui glăi pioh ngă tui rơwang bruă jơlan wer 4 – Kual Plơi prong jưh jom Hà Nội lĕ 5,7 ektar mơ̆ng 143 bôh sang anô̆. Anai lĕ să blung a mơ̆ng tơring glông Hoài Đức truh akô̆ amăng pơsur mơnuih ƀôn sang pơsir anih anom mă yua lŏn pơkra jơlan kơ rơwang bruă jơlan wer 4. Truh ră anai abih bang mơnuih ƀôn sang čơkă mă prăk pơ ala glăi, jao lŏn kơ rơwang bruă hăng lăng ƀuh hơdôm rơwang jơlan blung a mơ̆ng rơwang bruă pơphun raih ƀê tông kơ su. Yă Đỗ Thị Tuyết, Khua Grŭp hyu mă bruă Jơnum djop djuai ania mơnuih mơnam plơi Minh Hòa 3, să Minh Khai brơi thâo:

 “Khua plơi hăng Grŭp hyu mă bruă Jơnum min khom rô hyu kiăng ngă anun kah mơ̆ng dưi tui anun. Grŭp hyu mă bruă mơ̆ng Jơnum min plơi hmâo pơsur neh wa ăt pơmin mơn, ƀu thâo pơplih tui anun amra bưp tơnap mơn? Tui anun mơ̆ng kiăng ngă tui tơhnal pơkă mơ̆ng lŏn ia lĕ hơdôm bôh sang anô̆ ngă tui”.

Ngă tui jơlan gah “ană plơi thâo, ană plơi črông lô, ană plơi ngă, ană plơi pel ĕp, ană plơi lăng tui, ană plơi tŭ mă", amăng rơwang bruă rơgao, Jơnum min djop djuai ania mơnuih mơnam dêh čar Việt Nam hmâo git gai pơjing 31 grŭp lăng tui kiăng pơphun lăng tui akô̆ bruă; Jơnum min djop djuai ania mơnuih mơnam dêh čar Việt Nam hơdôm gưl ƀơi plơi pla hmâo git gai, gum hrŏm lăng tui hmâo 321 rơbâo bruă mă. Bruă lăi nao mơnuih mơnam djru ngă tui tơlơi dưi ngă pô mơ̆ng mơnuih ƀôn sang amăng gum hrŏm pơđĭ kyar bơwih ƀong - mơnuih mơnam. Khă hnun hai, amăng bôh nik ƀơi lu anih anom hmâo hơdôm tơlơi mơnuih ƀôn sang ƀuh, mơnuih ƀôn sang thâo, samơ̆ ƀu kiăng lăi ôh, ƀu khin lăi, ƀu khin lăi glăi. Nai tha prin, Nai prin tha Vũ Văn Phúc - Kơ-iăng Khua Khul kơsem min bôh thâo phrâo hơdôm bôh ƀirô Ping gah dêh čar rơkâo:

 “Hluai tui bôh nik lăi lĕ: mơnuih ƀôn sang gum hrŏm pơdŏng, pơplih pơkra ping gah mơnuih ƀôn sang, djru mut bruă lăng tui mơnuih apăn bruă ping gah samơ̆ akă hmâo sa hơdră sit nik pioh ngă tui bruă lăng tui mơ̆ng Jơnum min djop djuai djuai ania, hơdôm khul grŭp kơđi čar mơnuih mơnam hăng mơnuih ƀôn sang. Yua anun, kiăng ngă tui hloh dong bruă mă mơ̆ng mơnuih ƀôn sang amăng pơsit, lăng tui khul mơnuih apăn bruă, mơnuih ping gah ngă tui bruă gơgrong, bruă mă mơ̆ng pô; mơnuih apăn bruă, mơnuih ping gah ngă tui tơlơi ba gru hlâo; lăng tui mơnuih apăn bruă, mơnuih ping gah pơhrăm pran jua klă hiam, tơlơi hơdip mơda”.

Kiăng bruă lăng tui, lăi glăi mơ̆ng Jơnum min ƀu dô̆ ngă tui tŭ mơ̆ng hmâo dong tah khom pơkă rơđah pioh mơnuih ƀôn sang dưi thâo djop tơlơi pơhing, djơ̆ sit hăng hmao tlôn. Lăng tui, lăi glăi mơ̆ng mơnuih ƀôn sang khom ngă tui rơđah, pơdah abih bang, ngă tui prong hloh, tum djop hloh tơlơi gum hrŏm mơ̆ng mơnuih ƀôn sang, biă ñu bruă mă mơ̆ng mơnuih ƀôn sang amăng lăng tui mơnuih apăn bruă, mơnuih ping gah ƀơi anih mă bruă hăng anih dô̆. Khom tơpă tŭ mă, lăi glăi, pơsir tơlơi rơkâo đĭ lăng tui, lăi glăi mơnuih mơnam mơ̆ng Jơnum min djop djuai ania mơnuih mơnam dêh čar Việt Nam. Yă Nguyễn Quỳnh Liên, Khua Grŭp tơpă, lăng tui hăng lăi glăi mơnuih mơnam, Jơnum min djop djuai ania mơnuih mơnam dêh čar Việt Nam brơi thâo:

 “Ƀing gơmơi amra kơsem min pioh mă yua sa hơdră pơhlôm ngă tui hơdôm tơlơi rơkâo đĭ mơ̆ng Jơnum min tơdơi kơ lăng tui, lăi glăi. Mơ̆ng hơdră ngă tui anai amra ba tơbiă hơdôm hơdră pơkă hăng tañ pơplih phrâo tơlơi pơkă amăng Mơta tơlơi 14 ƀơi Tơlơi pơkă 69, ăt kah hăng hơdôm bruă ba tơbiă amăng Črâo ba mrô 22 mơ̆ng Grŭp git gai Ping gah, kiăng pơhlôm hơdôm bôh ƀirô khom hmâo bruă gơgrong amăng ngă tui tơlơi rơkâo đĭ mơ̆ng Jơnum min”.

Bruă lăng tui, lăi glăi mơ̆ng Jơnum min djop djuai ania mơnuih mơnam dêh čar khom hluai tui mơnuih ƀôn sang, ngă tui prong hloh tơlơi gum hrŏm, gum hơgôp mơ̆ng mơnuih ƀôn sang. Kiăng hmâo hơdră pơkă pioh mơnuih ƀôn sang ngă tui tơlơi lăng tui, lăi glăi. Ngă tui bruă lăng tui mơ̆ng mơnuih ƀôn sang yơh pô ngă tui tơlơi pơmin mơ̆ng Khua mir sir Hồ Chí Minh “mă mơnuih ƀôn sang ngă phun”, kiăng pơphun, pơsur mơnuih ƀôn sang gum hrŏm lăng tui khul ping gah, mơnuih ping gah djru ba bruă lăng tui nao dơlăm hăng sit nik – ba glăi bôh tơhnal./.