Lu mơnuih pơ ala kơ mơnuih ƀon sang tơring glông Văn Giang, tơring čar Hưng Yên pơdah pran jua pơsit yôm bruă pơgang pơgăn hưp ƀong kông ngăn – tơlơi ngă soh dưi hmâo Ping gah, Kơnuk kơna ngă tui hơdôm hrơi rơgao. Bruă pơgang pơgăn tơlơi hưp ƀong kông ngăn – tơlơi ngă soh djru pơgăn, pơtrut kơdun tơlơi hưp ƀong kông ngăn – tơlơi ngă soh, hơkrŭ đĭ, kơtưn tơlơi đăo kơnang mơ̆ng mơnuih ƀôn sang hăng Ping gah, Kơnuk kơna.

Amăng mông bưp, Khua git gai Ping gah, Khua mir sir dêh čar ta ơi Tô Lâm brơi thâo amra đing nao črâo ba pơsir pơđut hơdôm bruă mă dô̆ tơdu, hơdôm bruă mă glăk ƀah wư hloh lĕ črâo ba pơsir pơđut hơdôm tơlơi tơnap, tơlơi gun amăng bruă pơsir hơdôm kơđi tơlơi hưp ƀong kông ngăn kah hăng pơsir kông ngăn, pơsit gơnam tam, gum djru tơlơi phiăn hyu hơduah mă, ba mơnuih đuăi kơdop, pơhrui glăi kông ngăn. Dua dong lĕ amra črâo ba pơtrut kơtang čih pơkra hăng ngă giong ha amăng plĕ tơlơi pơkă pơgang, pơgăn hưp ƀong kông ngăn, tơlơi ngă soh. 3 lĕ amra đing nao črâo ba kơtang ha amăng plĕ ba glăi bôh tơhnal hloh dong, bruă pel ĕp, lăng tui, hơduah ĕp, lăng glăi prăk mă yua./.