VOV4.Jarai - Hăng pran hrưn đĭ, ngă pơdrong ƀơi lŏn pô hmâo, lu hlăk ai ƀơi tơring glông ƀun rin Buôn Đôn, tơring čar Daklak hmâo khin hơtai ĕp jơlan nao phrâo kiăng pơphun bruă mă hăng gum hrom djru nao rai tơdruă pơđĭ kyar

Pơwot glăi bruă mă tơdơi kơ hơdôm hrơi pơdơi tết tui phiăn juăt Nhâm Dần, ayong Hồ Thế Mỹ, ƀơi să Ea Ñuôl, tơring glông Buôn Đôn, tơring čar Daklak glăk tô nao rai klă hăng hơdôm bôh anom blơi gơnam tam, anih sĭ mơdrô raih daih kiăng pok prong anih ba hyu sĭ kơ rơbung Prang. Hơdôm hrơi anai, rơbêh kơ 10 ektar đang rơbung Prang mơng Sang bruă pơčruh prăk hrom bơwih ƀong sĭ mơdrô gơnam mă mơng đang hmua hơdjă Việt Nguyên (yua kơ ayong Mỹ ngă pô) hăng pơlir hơbit hăng mơnuih ngă đang hmua truh bơyan wok rơbung laih. Rim hrơi, sa ektar dưi pơhrui glăi hmâo năng ai ñu 1 tạ truh kơ 1 ta ha mơkrah rơbung Prang, hăng nua sĭ mơng 40 rơbâo prăk sa kg hăng lu hloh kơ anun dong tui hluai djuai rơbung.

Lăi pơthâo kơ lom pơjing bruă, ayong Mỹ brơi thâo, mơng rơnuč thun 2018, ñu pơanur sang anô̆ ñu jah lui abih bang 5 ar đang kơ phê, hơdai nao pla phun rơbung Prang. Pla rah nao hrăm tui rah tơlơi găn rơgao ƀơi hơdôm bôh tơring čar, ñu tum pơƀut ƀing gŏp ñu hmâo tơlơi pơmin tui ñu kiăng pơdŏng sang bruă, tô nao rai anih blơi sĭ. Ayong Hồ Thế Mỹ ruai glăi:

“Kâo bưp lu tơlơi lui ruh gah djuai phun pla, gah hơdră pla lĕ kâo hmâo nao laih pơ̆ hơdôm kual juăt pla djuai rơbung anai hrăm tui. Hơdôm bruă lŏn mơ̆ ngă đang juăt pla hơdôm djuai phun pla sui thun ƀu klă hiam hơdai nao pla phun rơbung Prang, pơplih hăng hơdră ta bơwih brơi abih bang ƀu hmâo mă yua kơmok jrao phun rơbung anai pơphun bluh đĭ. Kâo hrom hăng 3 čô mơnuih pơphun bruă hrom hăng sang bruă Việt Nguyên, pơlar prong, pơdŏng hyu djop anih hơdră pla rơbung Prang anai. Ba ñu truh hăng neh wa, pơtô glăi hơdră pla, djru pơjeh, kơmok pruai, hrom hăng neh wa pơđĭ kyar pơlar ñu ƀơi kual lŏn Buôn Đôn anai”.

Ayong Hồ Thế Mỹ (gah hnuă) lăi pơthâo kơ đang rơbung Prang hăng tuai hyu čuă lăng

Čang rơmang pơlir hơbit kiăng djru hrom pơđĭ kyar, blan 10/2021, ƀing hlăk ai glăk pơphun bruă ƀơi Buôn Đôn, hluai tui Khul grŭp hăng Khul pơlir hơbit hlăk ai tơring glông hmâo pơdŏng laih grŭp mơnuih pơphun bruă. Ayong Nguyễn Văn Hải, Khua Grŭp brơi thâo, hăng tơhnal djru brơi kơ ƀing gŏp pơphun bruă mă ba glăi bôh tơhnal, grŭp glăk tô nao rai hăng hơdôm khul grŭp, mơnuih tuh pơplai hăng hơdôm mơnuih hmâo tơlơi găn rơgao kiăng ƀơi anăp djru ba, lăi pơthâo kơ hlăk ai.

“Rim blan amra hmâo sa jơlan hơdră kơ phê pơphun bruă mă, jak iâu hơdôm mơnuih pơtô brơi ƀudah hơdôm mơnuih ngă start up kiăng lăi pơthâo nao rai hăng khul mơnuih pơphun bruă. Bưp, lăi pơthâo nao rai tơlơi pơhing kơplah wah hơdôm grŭp, gơnong bruă kah hăng Anom đang hmua, Anom bơwih ƀong – Anom mă yua kơ hơdôm hơdră pơsur bruă đang hmua, pơsur bruă măi mok; lăi pơthâo tơlơi pơhing hyu djop truh ƀing gơyut pơphun bruă amăng khul mơnuih pơphun bruă. Hyu čuă lăng hơdôm hơdră phrâo, tô nao rai hơdôm hơdră phrâo hăng hơdôm mơnuih blơi sĭ hăng hơdôm anom pôr pơhing kiăng pơtrut bruă sĭ hyu gơnam tam kơ hơdôm bôh anom pơphun bruă”.

Khul, grŭp pơphun bruă mă tơring glông Buôn Đôn čuă lăng hơdôm hơdră pơphun bruă mă

Tui hăng ayong Nguyễn Quang Trung, Khua git gai Khul hlăk ai tơring glông Buôn Đôn, hrom hăng pơdŏng khul pơphun bruă, kiăng ngă tui pran hlăk ai hăng pran jua khin pơmin, khin ngă mơng khul hlăk ai, tơdăm dra, hơdôm hrơi rơgao, hơdôm khul hlăk ai, grŭp ƀơi tơring glông hmâo ngă tui laih lu bruă djru hlăk ai pơđĭ kyar bơwih ƀong, kah hăng: pơphun hơdôm anih pơhrăm, hơdôm mông bơkơtuai kơ pơphun bruă. Gum hrom hăng Sang prăk gah Hơdră bruă mơnuih mơnam tơring glông gơgrong kơ hlăk ai čan prăk, pơsir keh prăk djru pơphun bruă... hăng abih bang mrô prăk rơbêh kơ 66 klai prăk djru hlăk ai ngă tui hơdôm bruă pơđĭ kyar bơwih ƀong. Ayong Nguyễn Quang Trung lăi:

“Ƀing gơmơi gir run pơjing rai sa pran jua pơphun bruă amăng hlăk ai, ngă gal brơi kơ ƀing gŏp dưi čan prăk pơđĭ kyar, pơjing hơdôm mông bơkơtuai kiăng ƀing gơyut dưi tô nao rai, kiăng pơtlaih tơlơi tơnap amăng bruă ngă tui hơdôm start up ƀơi tơring glông pô. Kâo ăt čang rơmang mơn gưl Ping gah, gong gai tơring glông đing nao abih pran jua bruă pơphun bruă mă, biă ñu bruă pơphun bruă hlăk ai ƀơi tơring glông. Hơdôm hơdră pơkă gah hơdră bruă mơng Kơnuk kơna, mơng tơring čar khom hmâo hơdôm tơlơi đing nao rơđah rơđông hăng tŭ ư hrom, sui thun hloh hăng ngă gal lu hloh kơ bruă pơphun bruă mă lăi hrom ăt kah hăng bruă pơphun bruă mă hlăk ai lăi ha jăn mơng tơring glông”./.

H’ Xíu: Čih – Siu H’ Prăk: Pơblang