VOV4.Jarai-Mơguah lơ 15/9, ƀơi Hà Nội, pơphun jơnum boh thâo ia rơgơi hăng akŏ ñu “Hlăk ai Việt Nam-Lao hrăm hăng ngă tui tơlơi pơmin mơ̆ng Khua mir sir Hồ Chí Minh hăng Khua mir sir Cay Sỏn Phôm Vi Hản yua kơ anom bruă Khul tơdăm dra mut phung rơnuk Hồ Chí Minh ngă hrom Anom pơtô bruă ping gah dêh čar pơphun. Anai lĕ bruă mă čơkă hok mơak hơdor glăi tal 60 thun Hrơi akŏ pơjing bruă pơtom hiăp, giăng mah Việt Nam-Lao hăng 45 thun hrơi kĭ pơkôl Ngă giăng mah laih anun Ngă hrom kjăp dua bơnah Việt Nam-Lao.

Mông jơnum bơkơtuai boh thâo ia rơgơi

Lu tơlơi pơgôp hiăp lăi pơthâo amăng mông jơnum, lêng kơ lăi tơlơi pơmin mơ̆ng Khua mir sir Hồ Chí Minh hăng Khua mir sir Cay Sỏn Phôm Vi Hản lĕ gram gơnam yôm pơphăn biă mă mơ̆ng dua bơnah ping gah, dua bơnah kơnuk kơna jing atur tơlơi pơmin, gai hñueng pơčrâo jơlan ngă bruă mơ̆ng Ping gah hăng bruă hơkrŭ dua boh dêh čar, amăng anun hơmâo phung hlăk ai Việt Nam hăng Lao. Tơlơi glăm ba kơđi čar mơ̆ng djop gưl hlăk ai dua boh dêh čar Việt Nam hăng Lao ăt tŏ tui hrăm, hơduah ĕp kiăng thâo hluh tong ten tui hăng tơlơi pơmin mơ̆ng Khua mir sir Hồ Chí Minh hăng tơlơi pơmin Khua mir sir Cay Sỏn Phôm Vi Hản.

Ƀing khua mua nao jơnum lăi pơtong: Djop gưl hlăk ai dua bơnah dêh čar Việt Nam-Lao jing rơnuk pô kiăo tui djă pioh bruă mă , pơđĭ kyar hăng pơbŭ đĭ prong tơlơi khăp giăng mah pŭ ƀăn hăng gum pơgôp yôm phara biă mă Việt Nam hăng Lao.

Nay Jek: Pơblang