VOV4.Jarai - Găn rơgao djŏp mơta tơlơi lông mơng klin Covid-19 ngă, hlăk ai, tơdăm dra amăng dêh čar ta hơmâo ngă lu hơbô̆ bruă pơčeh phrâo, djru ba mơnuih ƀă klin Covid-19 hăng ƀing glăk pơgang klin. Tơlơi anun pơdah rai tơlơi dưi hơdip hrŏm, ngă bruă hơdeč mơng hlăk ai amăng djŏp tơlơi truh, laih anun ba glăi lu tơlơi lăp hơdor.

Blan 5/2021, Khul hlăk ai hur har djru bruă ƀơi hơdôm boh tơring čar gah Kơdư hơmâo ngă lu bruă iâu pơgôp, pơčruh prăk, djru ba gơnam ƀong huă, khăn gôm ƀô̆, ia jrao rao tơngan kơ hơdôm boh tơring čar Hà Nam, Vĩnh Phúc, ƀon prong Hà Nội. Amăng anun, hơmâo đoan klum, pơgăn ia pơnah hơmâo ƀing hlăi ai pơkra, ba glăi anŏ klă biă đah mơng plai ƀiă klin lar hyu. Amăng 3 hrơi ngă bruă, Đinh Ngọc Thảo, hrŏm hăng ƀing gŏp Ký túc xá Pháp Vân, Hà Nội hơmâo pơkra 1000 blah đoan pơgăn mơ-it nao pơ anih hơmâo klin kơtang:

“Buh ao mơtah hlăk ai hur har pran jua djru mơnuih mơnam, grup ƀing gơmơi hok mơ-ak biă lơ̆m hơmâo Khul hlăk ai dêh čar hăng khul grup pơkŏn jao bruă pơkra mơnil kơsu pơging ia pơnah ƀơi ƀô̆ mơta, čang rơmang gum pran djru hrŏm bruă pơgang klin.

Amăng mông hơmâo klin Covid-19, hlăk ai amăng dêh čar ăt hơmâo pơkra lu gơnam phara djru ba mơnuih ƀă klin Covid-19 hăng ƀing ơi ia jrao, ling tơhan glăk dŏ pơgang klin. Anun lĕ sưng đih pơkra hăng hla pơ-ar catong bơwih brơi anih pơčlah; pơgăn brơi hơdôm anih pioh mă ia adung pơčrang kman hơmâo măi bluh angin rơ-ơ̆ kơ ƀing ơi ia jrao ƀudah “Ao rơ-ơ̆” djru plai ƀiă ngă hơ-uh kơ ƀing ơi ia jrao mă ia adung pơčrang kman amăng hrơi adai pơ-iă...Hơdôm gơnam pơkra tui anai yôm biă mă, djru ba ƀing glăk pơgang klin.

Lơ̆m mrô mơnuih F0 pơ Hà Nội lu tui amăng akŏ thun 2022, khul hlăk ai, Khul pơlir hơbit hlăk ai Hà Nội hơmâo ngă hơbô̆ bruă ATM oxy, ba oxy djru ba mơnuih ƀon sang ƀă F0 pơjrao pơ sang. Amai Nguyễn Thị Phương Dung, Khua hlăk ai kuâ̆n Tây Hồ brơi thâo: hơbô̆ bruă ATM oxy ƀrô djru mơnuih ƀon sang hơđong pran jua pơjrao pơ sang, ƀrô plai ƀiă kơhniă anih đih pơ sang ia jrao hai:

“Hlăk ai amăng plơi pla hơmâo ngă bruă djru pơgang klin. Hlăk ai gum djru ba ƀing F0, ba hyu kơƀiñ oxy mơtah tơl sang, pơhiăp nao rai hăng khul ơi ia jrao hlăk ai, Gong phun iâu telephôn 1022 djru ba mơnuih pơjrao pơ sang. Rơngiao kơ akŏ pơdong lu grup hlăk ai djru tlâ̆o, iâu pơthưr arăng djru gơnam yua kơ mơnuih glăk pơjrao pơ sang dong”.

Ƀu kơnong pơčeh phrâo amăng bruă djru ba mơnuih ƀă F0 hăng ƀing nao hlâo pơgang klin đôč ôh mơ̆, amăng 2 thun rơgao, hơdôm rơbâo čô hlăk ai lĕ ơi ia jrao, čơđai hrăm bruă ia jrao, ƀing buh ao blue kô̆ tơña nao djru ƀing ơi ia jrao pơ anih hơmâo klin. Rơbêh 2 blan rơkâo mut nao pơ ƀon prong Hồ Chí Minh hrŏm hăng ƀing duam ruă pơgăn glăi Covid-19, thạc sỹ - ơi ai jrao Đỗ Doãn Bách, Anih pơjrao ruă arăt hơtai boh, Sang ia jrao Bạch Mai thâo hluh tơlơi kiăng, tơlơi čang rơmang mơng ƀing F0 pơjrao pơ sang, lơ̆m sang ia jrao lu đơi mơnuih. Ơi ia jrao Đỗ Doãn Bách hrŏm hăng ƀing gŏp akŏ pơdong hăng mă yua “Glông pơtruh nao rai ơi ia jrao gum hrŏm” pơtô brơi kơ 150 rơbâo čô mơnuih F0 pơjrao pơ sang:

“Amăng hrơi mut nao pơ kual dơnung pơgang klin, kâo kiăng djru ba lu mơnuih. Ƀơi mông anun, anom bruă hơmâo pơdong, kâo hơmâo hmư̆ lu tơlơi iâu mơng mơnuih ƀon sang, čang rơmang juh alum pran jua, pơtô brơi mơnuih ruă nuă. Amăng glông pơtruh nao rai nai ia jrao gum hrŏm, kâo gơgrong bruă ruah mơnuih hăng pơtô pơjuăt kơ ƀing ơi ia jrao pơtô, djru ba mơnuih ƀă klin pơjrao pơ sang. Ră anai glông pơtruh nao rai hơmâo 12 rơbâo čô mơnuih ngă bruă lĕ ƀing ơi ia jrao”.

Ƀu kơnong pơčeh phrâo đah mơng djơ̆ hăng hrơi mông pơgang klin đôč ôh, thun 2021, hlăk ai Việt Nam rơkâo 2,2 klăk tơlơi pơčeh phrâo hluai tui bruă mă, amăng anun hơmâo 74 rơbâo tơlơi pơčeh phrâo hơmâo hlăk ai djŏp gưl djru ba. Tui hăng ayong Ngô Văn Cương, khua hlăk ai mut phung Hồ Chí Minh: khul hlăk ai lêng pơjing rai anih brơi ƀing čơđai pơčeh phrâo tơlơi rơgơi, hăng pơphun ngă hơdôm tơlơi pơmin anun:

Khul Hlăk ai dêh čar hơmâo Glông pôr pơhing điện tử tum pơƀut abih bang tơlơi pơčeh phrâo mơng hlăk ai amăng dêh čar ta. Tơdơi kơ anun, gơmơi jao kơ hlăk ai tơring čar, ƀon prong lăng glăi hơdôm tơlơi pơčeh phrâo dưi ngă đah mơng djru ba, hơmâo mơnuih mă bruă, hơmâo hơdră djru kơ ƀing hlăk ai dưi pơphun ngă tơlơi gơñu pơmin.

Hăng tơlơi gum djru mơng Khul hlăk ai, amăng djŏp bruă mă, hlăk ai Việt Nam amra pơtrut tui tơlơi pơčeh phrâo, kơtưn gum djru, pơđĭ kyar lŏn ia./.

Phương Thoa: Čih - Siu H’Mah: Pơblang