Tui hăng tơlơi lăi pơthâo glăi mơng Kông ang tơring čar Dak Lak, tơlơi rơnuk rơnua hơđong ƀơi đơ đam tơring čar Dak Lak pơwot glăi kah hăng hơđăp laih, hơdôm bruă mă mơnuih mơnam tui tơđar ƀu hmâo hơget pơplih ôh. Tơlơi hơdip rim hrơi pơwot glăi kah hăng hơdôm hrơi hlâo kơ 11/6.

Amăng mlăm lơ 13/6 hmâo laih sa čô mơnuih gum hrom tơlơi ngă rung răng tơbiă phaih pô. Tui anun, truh ră anai hmâo 3 čô mơnuih gum hrom bruă yua phao kơsung blah anih mă bruă kông ang dua bôh să Ea Tiêu hăng Ea Ktur tơbiă phaih kiăng dưi păp ñai brơi. Yap truh mơguah lơ 14/6, Khul kông ang hmâo mă pơkŏng 46 čô ngă rung răng ƀơi Jơnum min mơnuih ƀôn sang dua bôh să Ea Tiêu hăng Ea Ktur. Kông ang tơring čar Dak Lak iâu pơthưr dong mơnuih “jrôk jơlan” tơbiă phaih pô kiăng dưi păp ñai brơi./.