Hơdôm hrơi rơnuč blan 3, ƀơi glông jơlan đuăi hmar Khánh Hòa – Buôn Ma Thuột, črăn găn Tiểu khu 1148, kual lŏn glai plơi Ea Rớt, să Čư̆ Pui, tơring glông Krông Bông, rơbêh kơ 30 čô mơnuih mă bruă hrŏm hăng hơdôm pluh bôh rơdêh yôm mơ̆ng Sang bruă Grŭp Đạt Phương glăk pơkra tañ. Ayong Vũ Đức Hùng, pô gơgrong bruă măi mok mơ̆ng sang bruă brơi thâo: Anai lĕ anung prăk XL03 gah Rơwang bruă 2, hăng 14km găn glai klô nao pơ̆ bah amăng jơlan luh Phượng Hoàng. Khă hnun hai, truh rơnuč 3 blan tal 3 thun hlâo, sang bruă mơ̆ng jao anih anom pơkra jơlan, ngă rơnoh bruă kaih năng ai ñu 30%.

“Sang bruă glăk man pơkra dua bơnah bah amăng luh gah Yŭ hăng gah Ngŏ. Bah amăng găh Yŭ pơkra mơ̆ng blan 9/2024, biă ñu pơkra tơdrông toa hăng klơi amăng luh; bah amăng gah Ngŏ mơ̆ng pok pơhai mơ̆ng blan 2/2025 hăng kơnong kơ hmâo ƀiă %, bruă mă biă ñu lĕ klơi lŏp lŏn. Ră anai ăt dô̆ gum mơn rơbêh kơ 3 ektar lŏn glai ƀơi črăn pơhrua nao akă dưi pơplih. Ƀing gơmơi čang rơmang dưi pơplih tañ pioh pơkra jơlan gêh gal”.

Rơwang bruă črăn 2 hmâo abih bang rơnoh prăk mă yua 10.436 klai prăk, ataih giăm truh 40 km, anih phun mơ̆ng plơi prong Ninh Hòa, tơring čar Khánh Hòa, rơgao hơdôm tơring glông Mdrak, Krông Bông hăng Ea Kar mơ̆ng tơring čar Dak Lak. Anai lĕ rơwang bruă hmâo prăk tuh pơplai prong hloh, yua kơ Grŭp wai lăng Rơwang bruă 6 – Ding jum man pơdŏng ngă pô tuh pơplai. Khă hnun hai, rơnoh bruă man pơkra ƀơi anai ră anai kaih mơ̆ng 12% - 27%, tui hluai kơ anung prăk man pơkra.

Ơi Nguyễn Thanh Tú, Kơ-iăng Khua Grŭp git gai pơlir hơbit Grŭp Đèo Cả brơi thâo, pơlir hơbit glăk ngă tui anung prăk XL01, ataih 11 km, hmâo jơlan luh Phượng Hòang ataih 1,7 km, 10 bôh tơdrông tua dăp rơnoh sa hăng 5,6 km jơlan nao rai ... abih bang anung prăk mă yua 3.083 klai prăk. Amăng mrô 4 bah amăng jơlan luh khom pơdŏng pơkra, bah amăng jơlan luh gah iao bơnah gah Khánh Hòa ăt akă dưi pok mơn, yua kơ gun 1,9 ektar lŏn glai akă dưi pơplih. Rơngiao kơ anun, črăn ta-luy ƀơi dlông gah hnuă jơlan luh gah Yŭ tơring čar Dak Lak ăt glăk gun mơn lŏn glai klô mơ̆ng sa bôh sang anô̆ mơnuih ƀôn sang akă pơsir giong.

“Bơnah gah tơring čar Dak Lak, ră anai črăn lŏn rơbêh kơ 6.000 m kơrê akă dưi pơsit jơlan gah pơhrui glăi hăng hmâo jơlan gah pơ ala glăi kơ mơnuih ƀôn sang. Gơñu rơkâo pô gơgrong man pơkra khom pơdơi jăng jai pơkra jơlan ƀơi kual lŏn anai. Bơnah gah tơring čar Khánh Hòa, ƀing gơmơi phrâo pok bah amăng than jơlan luh gah hnuă amăng lơ 15/3 phrâo rơgao; than gah iao ăt glăk dô̆ tơguan mơn jơlan gah pơsit kông ngăn tuč rơnuč, juă nua giong mơ̆ng čơkă mă lŏn jao, laih anun kah mơ̆ng ba măi mok nao pok pơhai pơkra jơlan”.

Amăng 3 rơwang bruă jơlan đuăi hmar Khánh Hòa – Buôn Ma Thuột, rơwang bruă găn tơring čar Dak Lak djơ̆ tui rơnoh man pơkra klă hloh samơ̆ ăt bưp lu tơlơi gun mơn gah lŏn mă yua pơkra jơlan, bôh pơtâo pioh pơdŏng pơkra, lŏn pioh lŏp, jơlan glông hrĕ apui lơtrik hăng tơlơi tuh djah.

Ơi Nguyễn Thiên Văn, Kơ-iăng Khua Jơnum min mơnuih ƀôn sang tơring čar Dak Lak, brơi thâo, tơring čar glăk črâo ba khut khăt pơtlaih hơdôm tơlơi gun bơdjơ̆ nao anih mă lŏn lŏp, bôh pơtâo pioh pơdŏng pơkra hăng jơlan hrĕ apui lơtrik; rơkâo gưl tơring glông, să tañ bơkơtuai, pơ-anur hơdôm bôh sang anô̆ mơnuih ƀôn sang jao lŏn:

“Ƀing gơmơi hmâo črâo ba Grŭp wai lăng rơwang bruă, pô gơgrong pơdŏng, Jơnum min mơnuih ƀôn sang tơring glông Krông Pač hăng hơdôm gơnong bruă, anom bruă pơtrut klă rơnoh bruă lŏn kơ mơnuih gơgrong pơdŏng. Gah tơlơi kơƀah bôh pơtâo pơdŏng, tơring čar hmâo tŭ ư hrŏm hăng grŭp wai lăng tơring čar Dak Lak hăng ƀing gơgrong pơdŏng, hrŏm hăng Grŭp wai lăng rơwang bruă 6, ba nao bôh pơtâo mơ̆ng Rơwang bruă črăn 2 pơ̆ Rơwang bruă črăn 3 pioh pơtrut tañ rơnoh. Gah jơlan hrĕ apui lơtrik mă yua, Jơnum min mơnuih ƀôn sang tơring glông hmâo črâo ba hơdôm bôh să pok pơhai tañ, djru ba mơnuih ƀôn sang, hăng ngă brơi kơ pô man pơkra jơlan rah”.

Truh ră anai, rơwang bruă črăn 1 yua tơring čar Khánh Hòa ngă pô tuh pơplai hmâo jao laih 93% mrô lŏn, samơ̆ rơnoh man pơkra kơnong kơ hmâo akă truh 49%, kaih 8,3% bơhmu hăng kơčăo bruă. Rơwang bruă ră anai bưp tơlơi gun ƀơi 15 bôh anih tơnap pơsir; bruă ba đuăi anom mă yua măi mok kah hăng hơdôm ară jơlan hrĕ apui lơtrik hmâo jua kơtang, hrĕ dăng kông, glông hrĕ apui pơčrang rơđah... ăt glăk bưp tơnap mơn. Ơi Đinh Văn Thiệu, Kơ-iăng Khua Jơnum min mơnuih ƀôn sang tơring čar Khánh Hòa, črâo rơđah hơdôm tơlơi gun kiăng pơtlaih kơ rơwang bruă:

“Amăng mrô 42 čô, hmâo 18 čô khom pơpha pơdŏng glăi anih dô̆ hơđong. Ră anai, lŏn pơdŏng glăi hơđong anih dô̆ gah kual pơdŏng glăi anih dô̆ hơđong dưi hmâo tơring čar Khánh Hòa pơdŏng pơjing pơpha djop kơ hơdôm mơnuih pơdŏng glăi hơđong plơi pla. Kơnong kơ 24 bôh sang anô̆ ƀu pơpha anih pơdŏng hơđong, tơring čar amra pơsir pơđut hlâo kơ lơ 30/3 pơ̆ anăp anai. Tơdah hơdôm bôh sang anô̆ ƀu gum hrŏm tŭ ư mrô prăk pơ ala glăi, amra pơphun pơgô̆ tui tơlơi pơkă, yua kơ ƀu dô̆ hơdră hơpă dong tah".

Truh ră anai, rơwang bruă jơlan đuăi hmar Khánh Hòa – Buôn Ma Thuột hmâo pơkra giăm truh 2 thun laih, dưm kơnar hăng ha mơkrah mrô hrơi blan pioh kơ rơwang bruă. Khă hnun hai lu “anih anom dô̆ đôm” mơ̆ng hrơi blung a ƀơi rơwang bruă anai ăt dô̆ mơn. Anai lĕ tơlơi gun prong hăng tơhnal pơkă pơkra giong amăng rơnuč thun 2026 hăng mă yua amăng akô̆ thun 2027 mơ̆ Khua dêh čar hmâo ba tơbiă./.