VOV4.Jarai - Hrŏm hăng ƀing čơđai sang hră amăng dêh čar, ƀơi kual Dap Kơdư ƀing čơđai nao pơplông abih anih 12 thun 2022 hơmâo nao pơ anih čih anăn, ngă hră pơplông amăng tlam tom brơi lơ 6/7 laih anun mơguah hrơi anai pơplông tơlơi hrăm blung a, anun lĕ ngữ văn. Ƀơi Dak Lăk, lu čơđai lơ̆m hơmâo tơña gơñu lăi huăi hŭi hơget ôh, kơjăp pran nao pơplông. Mah lu wơ̆t pơplih tơlơi hrăm mơng hrăm pơ sang hră hơdai nao hrăm mơng ataih, pơwơ̆t nao pơwơ̆t rai lu wơ̆t tui anun yua klin Covid-19 ngă, bơbeč prong biă kơ bruă hrăm hră mơng ƀing čơđai anih 12, samơ̆ hăng tơlơi gir run mơng pô, wơ̆t hăng tơlơi djru ba mơng ƀing nai, lu čơđai brơi thâo gơñu hơmâo prăp lui kơjăp laih tơlơi hrăm, nao pơplông hăng pran jua mơ-ak. Tal pơplông abih anih 12 thun anai, tơring čar Dak Lăk hơmâo rơbêh 20.400 čô čơđai čih anăn pơplông ƀơi 32 anih.

Mơng mơguah lơ 6/7, Hlăk ai tơring čar Gia Lai hơmâo pơphun bruă “Pơtô ba- djru ba ƀing čơđai pơplông” thun 2022. Kiăng djru ba ƀing čơđai hăng pô kiăo tui čơđai nao pơplông abih anih 12 thun 2022, Khul git gai jơlan hơdră “Pơtô ba - Djru ba ƀing čơđai pơplông” tơring čar Gia Lai hơmâo akŏ pơdong 39 grup hlăk ai djru brơi, hơmâo 292 čô mơnuih. Ƀing hlăk ai amra djru: pơtô brơi sang pơdơi jăng jai huăi mă prăk, sang pơdơi rơgêh, anih ƀong huă rơgêh, ƀong huă jơman kơ ƀing čơđai hăng pô kiăo tui; djru pơgiăng ba ƀing čơđai nao rai pơplông; djru brơi ƀing čơđai sang anŏ tơnap; brơi khăn gôm ƀô̆, ia mơñum. Tơdơi kơ hrơi pơphun bruă, ƀing hlăk ai ječ ameč nao pơ anih pơplông či djru ba ƀing čơđai.

Ƀing hlăk ai tơring čar Gia Lai nao pơ anih pơplông djru brơi ƀing čơđai amăng hrơi pơplông abih anih 12

Tal pơplông abih anih 12 thun anai, tơring čar Lâm Đồng hơmâo rơbêh 14.000 čô čơđai čih anăn nao pơplông. Kiăng kơ pơhlôm brơi tal pơplông pơphun gêh gal, rơnuk rơnua, tơpă sit laih dong djơ̆ hăng tơlơi pơkă, tơring čar hơmâo prap lui 38 boh sang hră hăng 629 anih pơplông, amăng anun hơmâo 6 anih pơmut hrŏm ƀơi tơring glông, plơi prong amăng tơring čar. Hrŏm hăng bruă kơtưn amăng pơgang klin, pơhlôm hơdjă gơnam ƀong huă, hơđong amăng jơlan glông, tơring čar Lâm Đồng git gai gong gai ƀon lan djru brơi hmao tlôn ƀing čơđai sang anŏ tơnap tap kơ prăk kak ƀong huă hăng đĭ rơdêh nao rai. Tui hăng yă Trần Thị Vũ Loan, Kơ-iăng Khua Jơnum min mơnuih ƀon sang plơi prong Đà Lạt, hrŏm hăng ngă gêh gal hloh brơi kơ ƀing čơđai, yua kơ tal pơplông pơphun amăng bơyan Đà Lạt hơmâo lu tuai nao čuă ngui pơdơi pran, yua anun bruă pơhlôm brơi čơđai đuăi nao rai amăng jơlan glông tañ hloh lĕ bruă kiăng đing nao. 

Khua mua tơring čar Lâm Đồng pel ĕp bruă prăp lui tal pơplông abih anih 12 thun 2022

Siu H’Mai - Siu Đoan: Pơblang