VOV4.Jarai - Hrơi anai, lơ 16/2, 2.656 čô hlăk ai mơng tơring čar Gia Lai amra nao ngă tơhan hăng ngă Kông ang mơnuih ƀon sang. Truh mông anai, ƀing hơmâo nao pơ anih arăng iâu čih pơčrang hmar kman Covid-19 hăng mă ia adung pơčrang hăng RT-PCR. Mrô tơhan anai amra hơmâo jao kơ hơdôm puih kơđông tơhan: Quân đoàn 3, Quân khu 5, Kông an tơring čar, Anom bruă git gai tơhan pơgang guai tơring čar hăng Anom bruă git gai tơhan tơring čar. Tui mrô jŭ yap, mrô mơnuih nao ngă tơhan thun anai hơmâo mơnuih hrăm gưl 2, gưl 3 giăm 80%; hrăm trung cấp, cao đẳng, đại học hơmâo rơbêh 1,4%; hlăk ai mut phung hơmâo rơbêh 76%; hơmâo 22 čô lĕ mơnuih ping gah. Thun anai, amăng mrô 2.250 čô hlăk ai nao ngă tơhan, hơmâo truh 61% lĕ mơnuih djuai ƀiă. Kiăng ƀing hlăk ai hơđong pran jua nao ngă tơhan, hơdôm tơring glông plơi pla hơmâo nao čuă, tơña bla, juh alum, pơtă pơtăn, pơƀut ngă klă tơlơi djru kơ bruă tơhan.

Thun 2022, tơring čar Lâm Đồng dưi jao tơhnal pơkă ruah hăng iâu 1.150 čô mơnuih djop thun nao ngă tơhan. Tơlơi pơkă ruah anai, brơi mơnuih ƀôn sang mut tơhan pơphun djơ̆ Tơlơi phiăn pơkă mut ngă tơhan thun 2015; ngă djơ̆ tơhnal pơtrun, tŭ yua, djơ̆ anŏ kiăng akŏ pơjing khul ling tơhan amăng rơnuk phrâo; pioh ĕp mơnuih ngă khua apăn bruă kơ kual plơi pla pơ djop plơi pla kual ataih, kual asuek.

Kiăng ngă tui tŭ yua bruă ruah mơnuih mut ngă tơhan, djop plơi pla čih anăn pơthâo pơ să, phường, tơring kual, djop sang hră gưl klâo, sang hră pơtô bruă mă amăng tơring čar, brơi kơ djop mơnuih truh 17 thun laih thâo. Bruă jak iâu mut tơhan dưi ngă tui djop mrô pơkă, djop anŏ tŭ yua pơtrun samơ̆ pơpŭ tơlơi ngă khua pô mơ̆ng mơnuih ƀôn sang, bơkơnar, pơhaih rơđah. rơnuk rơnua, pơkrem; lăng yôm tơlơi glăm ba mơ̆ng djop sang bruă, khul grup hăng rĭm čô mơnuih amăng bruă iâu mut tơhan.

Tui hăng akŏ bruă, 170 čô mơnuih djơ̆ anăn nao ngă tơhan mơng plơi prong Kon Tum, tơring čar Kon Tum hơmâo arăng prăp brơi anih ƀong huă, anih dŏ, pơƀut ƀơi Anom bruă Pơtŏp tơhan, mơng lơ 11/2 truh hrơi jao čơkă tơhan thun 2022. Amăng mông anai, ƀing djơ̆ anăn nao ngă tơhan hơmâo jơnum, pơtŏp bruă kah hăng ƀư̆ drơi jăn mơng yang hrơi mơguah, 16 tơlơi pơtŏp hrăm taih lơ̆m mơguah, tơlơi pơtô nao rai, rơbat, dŏ dong, kơkuh, pơtô kih rơmet, tơlit abăn khăn, pơtô adoh hăng čơkă ƀuk tui tơlơi phiăn mơng khul ling tơhan; laih dong pơphun bruă ngui ngor, adoh suang kiăng hlăk ai hơmâo pran ƀiă hlâo kơ hrơi nao ngă tơhan. Hăng tơlơi gir run, khŏm dưi ngă mơng ping gah, gong gai hăng Khul wai lăng mơnuih nao ngă tơhan plơi prong Kon Tum amăng bruă wai lăng, pơčlah pơƀut hrŏm ƀing tơhan hlâo kơ hrơi nao ngă tơhan, amra djru kơ tơring čar Kon Tum ngă truh kih bruă ruah mơnuih nao ngă tơhan thun 2022.

Siu H’Mai - Nay Jek:  Pơblang