Thiếu tá H’Quý Rčom (H’Quý Rơ Chăm) dŏ mă bruă ƀơi grup hyu pơtô pơblang pôr tơlơi pơhing gru grua hiam-Anom bruă Kơđi čar Sang bruă khua tơhan tơring čar Dak Lak. Rơbêh 20 thun mă bruă amăng Grup hyu pơtô pơblang pôr tơlơi pơhing gru grua, ñu hơmâo hyu djop anih anom, plơi pla ala ƀôn kual tơnap tap hloh amăng tơring čar, kiăng ba tơlơi pơhing phrâo adoh suang mơak djru ană plơi pla pơblih tơlơi pơmin bruă mă, pơđĭ tui tơlơi thâo hluh kơ lu jơlan hơdră tơlơi phiăn Ping gah, Kơnuk kơna. Hrŏm hăng anun, hăng tơlơi gơgrong ba ngă Khua Khul đah kơmơimut phung amăng sang bruă Khua tơhan tơring čar Dak Lak, mơ̆ng thun 2019 truh ră anai, H’Quý Rčom hơmâo pok pơhai tŭ yua lu hơdră ngă kah hăng “Đah kơmơi rơgơi bruă čar, triăng bruă sang anŏ”; “Hơbô̆ bruă sang anŏ ƀing ling tơhan mơak klă”; tŭ jum lăng ba 3 čô ană amôn ling tơhan sang anŏ tơnap tap; ngă hrŏm hur har biă mă kơ bruă mơnuih tơpuôl ƀơi plơi pla…..Thiếu tă H’Quý Rčom lăi nao kơ bruă ngă hiư̆m pă dưi ngă giong bruă klă hiam hloh:

“Tui hluai hrơi blan, kah hăng grup hlăk hơmâo hơdră pơprong, lu bruă mă đơi, kâo khom hneč wơ̆t amăng pơdơi ăt mă bruă, mông pơdơi ăt mă bruă, kiăng ngă hiư̆m pă akŏ pơjing dăp bruă djơ̆ rơ-ua plah wah tơlơi thâo arăng jao ngă hăng bruă khom glăm ba mơ̆ng ta pô. Sit glăi pơ sang anŏ, kâo gir run ngă giong jing sa ami, sa čô bơnai amăng sang anŏ”.

Bơ amai Trần Thị Hải Yến, Khua gitgai ping gah, ding kơna kơđi čar sang bruă khua tơhan tơring kual Quảng Phú, tơring glông Čư̆ Mgar, bruă khom ngă hrăm na nao kiăng thâo amăng bruă mă, djru ba ƀing adơi amai 5 thun na nao mơtam jing ƀing nai pơtô bruă kơđi čar rơgơi gưl tơring čar Dak Lak. Thun 2023, ñu ngă hrŏm nao pơplông ƀing nai pơtô bruă ling tơhan, kơđi čar  rơgơi yua kơ Ding jum ling tơhan pơphun laih anun hơmâo mă pri apah bơni pơsur pran jua. Trần Thị Hải Yến lăi:

“Hlâo adih, ta mă bruă amăng Anom bruă Tơlơi phiăn hăng ngă lu bruă mă lu mông pơtô ƀơi plơi pla, ƀôn ƀut amăng tơring glông gah kơ tơlơi phiăn. Lơ̆m dŏ mă bruă amăng khul tơlơi phiăn anom bruă pơ ala mơnuih ƀôn sang tơring glông, ăt tom ngă bruă lăng tui bruă iâu pơmut tơhan, hơmâo pơđok tong ten lu hră pơar gah bruă anai, anun lơ̆m glăi mă bruă pơtô kơđi čar  kơ tơhan plơi huăi tơnap đơi lơi. Bơ bruă pok pơhai gah bruă pơgang rơnuk rơnua, lơ̆m thun blan gir run, kâo pô ngă rah bruă, hrăm rah, ăt dưi ngă djop bruă jao soh mơ̆n"”

Rơgơi bruă čar, pơhlôm bruă sang anŏ, wơ̆tamai H’Quý hăng Hải gơñu greh gruñ ngă bruă kơ sang anŏ hruaih, pơgang sang anŏ hơđong thâo rơnôm tơdruă. Ayong Lê Ngọc Nghĩa, rơkơi amai Hải Yến brơi thâo, thâo hluh bruă mă mơ̆ng bơnai pô, ñu amra pơtrut tui klôn kah pơpha djru ba bruă sang anŏ:

“Hơdôm hrơi mông bơnai rơkut hyu mă bruă ječ ameč, ƀudah hyu mă bruă, ta khom pơhrua bruă wai lăng ană bă. Juh alum pơtrut pran jua ană bă khom lăng gru amĭ pioh hrăm hăng gir run, yua kơ anun gru ƀuh ƀơi anăp mơta bruă mă sit nik. Ƀơi anŏ ta pơtrut pran jua ană bă kiăng tơdơi anai ƀing ană bă hơmâo pran jua gir run hloh kah hăng amĭ ama tom ngă laih”.

Lăi nao kơ ƀing bơn H’Quý hăng Hải, Đại tá Trần Minh Trọng-ding kơna kơđi čar anom bruă khua git gai ling tơhan tơring čar Dak Lak brơi thâo,  anai lĕ hơdôm ƀing ngă bruă hur har amăng djop bruă bơkơtưn ngă khom dưi ƀơi tơring čar thun blan rơgao.

“Ƀing bơn H’Quý Rčom hăng Trần Thị Hải Yến lăng kah hăng asar priă bơngač yôm amăng bruă bơkơtưn ngă bruă khom dưi mơ̆ng ling tơhan blah ngă ƀơi tơring čar mơ̆ng thun 2019-2024. Anai lĕ ƀing kah hăng “Hơdôm čơnuh bơnga hiam” amăng đang bơnga bruă pơplông kơ ling tơhan blah ngă ƀơi tơring čar, pơjing pran jua bang bơnagč lu hloh hăng pơtrut pơsur pran jua ƀing ling tơhan, ăt kah hăng ƀing đah kơmơi mut phung gah ling tơhan tơring čar Dak Lak”.

Đại tá Trần Minh Trọng lăi pơtong, Ƀign mơnuih bơkơtưn mă bruă lĕ jing ƀing thâo khăp kơ lŏn ia, tŭ mă thâo hluh dơlăm tơlơi pơtô mơ̆ng Wa Hồ : “Pơplông lĕ khăp kơ lŏn ia, khăp kơ lŏn ia khom pơplông mă bruă. Ƀing mơnuih pơplông lĕ jing ƀing mơnuih thâo khăp kơ lŏn ia hloh”, hơdôm thun rơgao, bruă bơkơtưn mă bruă khăp kơ lŏn ia, bơkơtưn mă bruă khom dưi amăng khul ling tơhan blah ngă tơring čar Dak Lak hơmâo bang bơngač jai hrơi prong tui. Mơ̆ng bruă bơkơtưn, hơmâo ƀuh hơdôm hơpluh čô mơnuih, khul grup ba gru hlâo amăng bruă mă, lu hơbô̆ bruă hiam, hơdră phrâo, pơčeh thâo ia rogơi kiăng akŏ pơdong bruă ling tơhan blah ngă tơring čar Dak Lak jai hrơi beč bal sit nik, hơdeč hmar, djơ̆ lăp hăng tơlơi kiăng amăng bruă mă rơnuk phrâo.