Bruă jơnum dưi pơphun tơdơi kơ hơdôm glông jơlan lŏn pơpư̆ hling hlang ƀơi tơring čar. Tơlơi čih glăi mơ̆ng Anom kơsem min bôh lŏn, mơ̆ng lơ 4/4/2021 pơphun hmâo hơdôm glông jơlan hơdôm tal lŏn pơpư̆ ƀơi tơring čar Kon Tum hăng kual phun ñu ƀơi tơring glông Kon Plông. Yap truh rơnuč blan 4/2025 ƀơi kual anai hmâo laih rơbêh kơ 1.000 tal lŏn pơpư̆ hăng rơnoh ñu mơ̆ng 0 truh kơ 1 jua kơtang. Tui hăng tơlơi pơsit mơ̆ng ƀing kơsem min bôh thâo phrâo, lŏn pơpư̆ truh ƀơi tơring glông Kon Plông, tơring čar Kon Tum pơphun ngă hăng phiăn pơkă hrŏm mơ̆ng lŏn pơpư̆ pơtrut, anun lĕ hmâo ha amăng plĕ amăng hơdôm hrơi blung a, hrŏ trun ƀơƀrư̆, pơđut tui hrơi mông.

Ƀơi anăp tơlơi anai, hrŏm hăng dưm truă 11 bôh anom pơkă lăng ayuh hyiăng lŏn drŏn ƀơi Kon Tum, mơ̆ng blan 3/2024 Anom kơsem min bôh lŏn hmâo ngă tui laih bruă kơsem min pơsit tơlơi lŏn pơpư̆ hăng ba tơbiă hơdôm jơlan gah bŏng glăi lăp djơ̆ kơ tơring čar Kon Tum hăng jum dar. Tơhnal pơkă truh blan 2/2027 lơm pơđut bruă kơsem min amra ngă rơđah anô̆ ba truh lŏn pơpư̆ anai ƀơi kual tơring glông Kon Plông, tơring čar Kon Tum; pơsit tơlơi bơdjơ̆ nao rai kơplah wah lŏn pơpư̆ hăng ia hmâo amăng dơnao kŏng; pơsit rơnoh huĭ rơhyưt mơ̆ng lŏn pơpư̆ hăng tơring glông hăng pơjing hơdră bŏng glăi kơ kual tơring glông Kon Plông ăt kah hăng hơdôm kual jum dar./.