Ơi K’Châu djuai ania K’ho (ƀơi thôn 2, să Lộc Nam, tơring glông Bảo Lâm, tơring čar Lâm Đồng) brơi thâo, sang anô̆ ñu hmâo anăn pioh čơkă mă 25,5 ektar lŏn pla kyâo ƀơi wual 5, kual 491, hăng yă Ka Phấn dô̆ hrom ƀơi plơi ăt hmâo ngă hră laih hăng hmâo anăn pioh čơkă mă 16,5 ektar ƀơi kual 491. Samơ̆ bôh nik ñu wot dua gơñu leng kơ ƀu hmâo mă kual lŏn hơpă ôh.

 “Glai plơi pla lĕ kâo hmâo anăn samơ̆ arăng ƀu hmâo jao ôh. Hlâo adih, met K’Hân hmâo lăi lĕ: Kâo hmâo anăn amăng hră jao lŏn glai. Kâo kĭ hră pơkôl. Laih anun ñu lăi: Kĭ kiăng kơ djơ̆ phiăn đôč, ŏng hiưm hmâo tơlơi pơkă pioh pla kyâo. Jao lŏn jao glai mơ̆ ƀu thâo jao ƀơi kual hơpă, ƀơi anih hơpă ăt ƀu thâo mơn. Hơƀơi jao mơng thâo!”.

Tui hăng hră čih anăn plơi pla ƀut sang anô̆ čơkă mă glai dưi hmâo Gơnong bruă đang hmua hăng pơđĭ kyar ƀôn lan tơring čar pơsit lĕ khua ƀut lĕ ơi K’Đản, ƀơi thôn 1 hăng 13 bôh sang anô̆ ƀơi hơdôm bôh thôn 2 hăng 4 gah să Lộc Nam. Tui anun mơn ƀu thâo hluh yua hơget ôh Jơnum min mơnuih ƀon sang tơring glông Bảo Lâm pung kơ ba tơbiă tơlơi pơsit jao glai kơ ơi Nguyễn Duy Minh, dô̆ ƀơi sang mrô 29, jơlan Tô Hiệu, phường Lộc Sơn, plơi prong Bảo Lộc ngă pô pơ ala. Hăng ƀut plơi yua kơ ơi Minh pơ ala anai kơnong kơ hmâo 6 bôh sang đôč, ƀu djơ̆ 14 bôh sang anô̆ kah hăng lơm pơjing jơlan gah ôh. Abih bang lŏn dưi jao lĕ 209 ektar, amăng anun hmâo 93 ektar, lŏn pla kyâo ƀu hmâo kyâo lĕ 116 ektar. Kah hăng abih bang mơnuih dưi jao lŏn glai amăng ƀut anai hmâo sang anô̆ ƀơi anih pơkon, hăng ƀu djơ̆ djuai ania ƀiă ôh.

Glai hăng lŏn pla kyâo ƀơi anai ƀơƀrư̆ jing đang phun pla pơkon, đa lĕ hơdai nao ngă hră blơi sĭ hăng pơdŏng sang. Tui hăng Gơnong bruă đang hmua hăng pơđĭ kyar ƀôn lan tơring čar Lâm Đồng, truh blan 9 thun 2019, amăng mrô 93 ektar lŏn glai hmâo jao plơi pla anai wai lăng, hmâo rơngiă laih pưh tơngan 73 ektar. Ơi Võ Thiên Bình, Khua Jơnum min mơnuih ƀôn sang să Lộc Nam pơtŏng sit bôh than glai hmâo arăng phă, lŏn pla kyâo hmâo arăng mă yua kơ jao ƀu djơ̆ mơnuih.

 “Bruă jao lŏn, jao glai hơdôm hrơi rơgao ƀơi să hmâo laih sa dua mơta tơlơi ngă soh. Ră anai ƀirô tơhan polih pel ĕp glăk ngă rơđah tơlơi anai. Khua wai lăng amăng bruă pơgang glai mơng anom pô glai dô̆ lu tơlơi akă gal, hmâo tơlơi ngă soh. Hmâo tơlơi ngă lĕ jao ƀu djơ̆ mơnuih”.

Lơ 8/7/2022, ơi Lê Văn Ba ƀơi thôn 4, să Lộc Phú ƀuh sa grŭp mơnuih 3 čô lĕ: Nguyễn Đức Dạo, Nguyễn Đức Chung hăng Nguyễn Văn Dũng glăk phă glai ƀơi wual 6, kual 438A. Ơi Ba hmâo grŭp mơnuih anai taih amang, hăng mrô rơka ruă 12%. Anom pel ĕp kơđi tơlơi mơnuih ƀôn sang tơring glông Bảo Lâm hmâo ƀom laih 2 čô ngă soh Nguyễn Đức Dạo hăng Nguyễn Đức Chung kơ tơlơi soh “Rŏng ngă rơka ruă”. Ơi Lê Văn Ba ƀu mơ-ak amăng pran jua ôh yua kơ 3 čô mơnuih anun taih ñu, samơ̆ kơnong kơ hmâo 2 čô mơnuih ƀom đĭ; bruă ngă prai glai kyâo hngô mơng grŭp mơnuih anai ƀu dưi hmâo ƀirô gơgrong gah bruă anai lăi nao ôh.

 “Mă tŭ bruă kơnuk kơna jao glai mơ̆ sĭ lui glai, phă glai, ngă prai lui mrô kyâo pơtâo lu biă. Kâo thâo ƀing ñu ngă soh, kâo ƀom đĭ lĕ, Khua tơring glông Bảo Lâm, Nguyễn Trung Kiên hmâo ba tơbiă tơlơi pơsit mă glăi abih bang lŏn jao anun kơ grŭp wai lăng glai pơgang hlôm hlâo Đam B’ri wai lăng, Samơ̆ ră anai, hơdôm tơlơi ngă soh mơ̆ Jơnum min mơnuih ƀôn sang tơring čar Lâm Đồng črâo ba Jơnum min tơring glông Bảo Lâm pơsir abih bang lŏn anun, pla glăi kyâo hăng ngă rơđah hơdôm mơnuih ngă soh pioh pơsir tui tơlơi pơkă. Samơ̆ truh ră anai tơlơi anun ăt ƀu hmâo tek rơwek nao mơn”.

Ƀơi tơring čar Lâm Đồng phrâo hmâo mă 8 bôh plơi dưi hmâo Jơnum min mơnuih ƀôn sang hơdôm bôh tơring glông jao lŏn glai hăng abih bang lŏn hmâo lĕ 2.260 ektar, samơ̆ truh ră anai mă pơhrui glăi laih 5 bôh plơi. Tơlơi lăp lăi lĕ wot 3 bôh plơi hăng 99 bôh sang anô̆ ƀơi tơring glông Bảo Lâm dưi jao giăm truh 860 ektar lŏn glai hăng lŏm pla kyâo, leng kơ hmâo mă glăi. Ơi Võ Danh Tuyên, Kơ-iăng Khua Gơnong bruă đang hmua hăng pơđĭ kyar ƀôn lan tơring čar Lâm Đồng lăi mơn:

 “Ƀơi Lâm Đồng hmâo tơlơi ruai lĕ jao glai ƀu djơ̆ mơnuih. Tal blung lom pel ĕp, pơsit lĕ djơ̆, samơ̆ črăn gah tlôn hơdôm bôh sang anô̆ anun gơñu mă tŭ hơdră bruă gum djru gơñu pơplih jing pô pơkon. Lŏn pla kyâo hmâo arăng sua mă, glai arăng phă. Lom ƀing gơmơi thâo lĕ rơkâo mă glăi, hăng hmâo mă glăi 5 hơdră pơkă kơ plơi pla. Ƀơi anun ăt hmâo mơn bruă gơgrong mơng mơnuih apăn bruă glai kyâo, pô glai, pô wai lăng glai kyâo hăng gong gai plơi pla ăt akă ngă tui khut khăt mơn amăng bruă anai”.

Lu bruă jơnum, lu tơlơi rơkâo đĭ, hăng tơlơi pơsit dưi hmâo gơnong bruă bơdjơ̆ nao hăng Jơnum min mơnuih ƀon sang tơring čar Lâm Đồng mă yua hăng bôh than: Rơkâo Jơnum min mơnuih ƀôn sang hơdôm bôh tơring glông mă glăi hơdôm tơlơi pơsit jao lŏn glai kơ khul plơi pla. Khă hnun hai bôh nik ñu, ƀơi hơdôm kual lŏn anai jing laih đang phun pla sui thun, pơdŏng sang kơjăp phik. Glai dưi jao hơdơ̆ hor anun rô̆ mă, sua mă. Bruă gơgrong anai ƀu djơ̆ kơnong kơ pơtrut nao rai kơ bơnah čơkă mă glai ôh. Anai năng ai ñu kơnong mă glăi hơdôm tơlơi pơsit jao glai kơ plơi pla lĕ puih tơngan bruă gơgrong?