Rơwang thun 2018-2024, ƀơi kual Dap kơdư hơmâo lu hơbô̆ bruă abih bang wai pơgang rơnuk rơnua lŏn ia, hơdôm bruă mă yôm tui jơlan gah wai pơgang lăi amăng mơnuih mơnam, hơmâo abih bang mơnuih djuai ania ƀiă dong yua, gir run mut hrŏm. Pơhmutu lĕ hơdôm hơbô̆ bruă “Pot glăi đăo gơnang, pơgang hơđong amăng plơi pla”, “Bruă wai lăng pơtô hrăm brơi ƀing tui FULRO amăng plơi pla” ƀơi tơring čar Gia Lai; hơbô̆ bruă “Sang jơnum hơđong mơ-ak-pơhlôm rơnuk rơnua”, “Grup wai pơgang rơnuk rơnua hăng pơtô hrăm brơi ƀing hlăk ai ngă soh” ƀơi tơring čar Kon Tum; hơbô̆ bruă “kual plơi pla rơnuk rơnua, ƀu hơmâo mơnuih ngă soh”, “3 tơlơi rơnuk rơnua, hơđong amăng Khul đăo hiam phrâo Ea Sol” ƀơi tơring čar Dak Lak; hơbô̆ bruă “5+1 wai lăng, pơtô pơjuăt, djru brơi ƀing mơnuih pot glăi plơi pla tơdơi kơ tơbiă sang krư̆ dưi mut hrŏm mơnuih mơnam”, “Sang jơnum Nhân Cơ pơgang rơnuk rơnua”, amăng tơring čar Dak Nông; hơbô̆ bruă “Ƀut plơi pla wai pơgang rơnuk rơnua”, “Mơnuih tui đăo kual mơnuih djuai ania ƀiă ƀut plơi 4, să Tân Châu pơlir hăng bruă wai pơgang rơnuk rơnua” mơng tơring čar Lâm Đồng….

Mơng hơdôm hơbô̆ bruă anai ăt ƀuh lu mơnuih ba gru ngă tui klă hơdră bruă mơng Ping gah, tơlơi phiăn mơng Kơnuk kơna, tơlơi pơkă amăng ƀon lan. Lu mơnuih gir run mut hrŏm, djru brơi hơdôm anom bruă bơdjơ̆ nao amăng wai pơgang rơnuk rơnua, pơtô pơblang, pơsur mơnuih ƀôn sang răng kơđiăng ƀơi anăp tơlơi pơčut pơčao ngă pơčlah djuai ania, pơgăn ƀing ngă soh, pơgang apui ƀong, hơđong ƀơi guai lŏn ia, gong gai, wai pơgang anih dŏ hơdip jum dar…

Amăng mông jơnum, Ding jum kông ang hơmâo jao hră pơpŭ brơi 86 khul grup, ƀing mơnuih ba gru pơ ala brơi hơdôm hơbô̆ bruă klă hiam amăng bruă abih bang wai pơgang rơnuk rơnua lŏn ia amăng plơi pla djuai ania ƀiă ƀơi kual Dap kơdư rơwang thun 2018-2024. Ơi Y Djan Êban, dŏ amăng să Ea Ktur, tơring glông Čư̆ Kuin, tơring čar Dak Lak lĕ sa amăng mrô mơnuih hơmâo arăng pơtô pơblang brơi tal anai, ñu brơi thâo:

“Kâo pơ-ư ang biă mă lơm hơmâo Ding jum kông ang jak iâu nao bơră ruai kơ bruă wai pơgang rơnuk rơnua lŏn ia. Kâo hok mơ-ak biă mă, Tơdơi kơ jơnum anai, lơm pot glăi pơ plơi pla amra hrŏm hăng neh met wa pơđĭ kyar bơwih ƀong huă, gru grua, mơnuih mơnam, wai pơgang rơnuk rơnua kah hăng pơplih ƀiă dong amăng plơi pla”.

Hrŏm jơnum djop kual, kơnong ƀơi tơring čar Dak Lak, ding jum kông ang ăt pơphun hrơi abih bang wai pơgang rơnuk rơnua lŏn ia ƀơi kual mơnuih djuai ania ƀiă thun 2024. Tui hră lăi pơthâo, bruă abih bang wai pơgang rơnuk rơnua lŏn ia hơmâo hơdôm tơlơi yak nao kơtang hloh, dơlăm tui mơng tơring čar truh pơ ƀon lan. Lu hơbô̆ bruă wai pơgang rơnuk rơnua, hơđong, lu grup pơgang, pơgăn ƀing ngă soh ba glăi tŭ yua. Đĭ pơhiăp amăng hrơi jơnum ngui, Trung tướng Lê Quốc Hùng, Kơ-iăng khua ding jum kông ang lăi pơtong; Dak Lak lĕ tơring čar tong krah kual Dap kơdư, anai lĕ anih akŏ phun kiăng wai pơgang hơđong, pơhlôm gêh gal brơi kơ bruă pơđĭ kyar bơwih ƀong huă-mơnuih mơnam, anai lĕ bruă jao yôm phun hăng djop anih anom kơđi čar. Trung tướng Lê Quốc Hùng rơkâo, Dak Lak tŏ tui pơtrut kơtang bruă wai pơgang rơnuk rơnua lŏn ia, pơgôp ngă pơtrut hăng tŏ tui tơlơi gơgrong, pran kơtang mơng mơnuih ƀôn sang:

“Kiăng đing nao hơkrŭ kjăp, pơjing anih anom kơđi čar ƀơi ƀon lan hơđong kjăp djop mơta. Rĭm čô mơnuih apăn bruă Ping gah kiăng jê̆ giăm, hluh rơđah tơlơi kiăng, tơlơi čang rơmang mơnuih ƀôn sang, yua tơlơi dưi kơ mơnuih ƀôn sang, ba gru, ba jơlan hlâo amăng bruă abih bang wai pơgang rơnuk rơnua lŏn ia. Pơtrut kơtang bruă pơtô pơblang pơlir hăng pơtrut pơsur, črâo ba mơnuih ƀôn sang. Kiăng nao tơl rĭm boh plơi pla akŏ phun, kual mơnuih djuai ania ƀiă, pơplih hơdră bruă pơtô pơblang kiăng pơjing bruă abih bang gum wai pơgang rơnuk rơnua lŏn ia”.

Amăng hrơi jơnum ngui, Ding jum kông ang hăng Jơnum min mơnuih ƀôn sang tơring čar Dak Lak hơmâo ƀơk lu anung gơnam brơi sang anŏ mơnuih djuai ania ƀiă tơnap tap amăng plơi prong Buôn Ma Thuột. Ƀrô tal anai, sa grup, 1 čô mơnuih hơmâo jao hră pơpŭ bơni mơng Ding jum kông ang, 1 grup, 3 čô mơnuih ƀơk hră pơpŭ mơng Khua kông ang tơring čar Dak Lak yua ngă klă amăng bruă abih bang wai pơgang rơnuk rơnua lŏn ia thun 2024. /.