Tui hăng tơlơi pơhing ƀơi mông jơnum, mơ̆ng thun 2021-2025, hơdôm tơring čar amăng kual Dap Kơdư kơnuk kơna jao brơi rơnoh prăk 11 rơbâo 700 klai prăk pioh ngă tui 3 hơdră mơ̆ng dêh čar pơtrun. Rơnoh prăk anai, dưm dưm hăng 11,73% rơnoh prăk pioh pơđĭ kyar mơ̆ng dêh čar brơi kơ 3 hơdră dêh čar pơtrun. Kơnong amăng thun 2022, dêh čar hơmâo pơpha brơi 3.878 klai prăk hăng kơ hơdôm tơring čar kual Dap Kơdư lĕ 877 klai 24 klăk pioh man pơdong. Truh lơ 31/12/2022, hơdôm tơring čar amăng kual Dap Kơdư phrâo mă yua rơbêh 34,77% rơnoh prăk dêh čar jao, ƀiă hloh 2,96% pơkă hăng anih pơkŏn mă yua prăk kơnuk kơna jao. Blan 1/2023, hơmâo 3 amăng mrô 5 boh tơring čar kah hăng Kon Tum, Lâm Đồng, Dak Nông ngă giong bruă yua abih rơnoh prăk amăng sa thun.

 Lăi pơthâo hăng Kơ-iăng Khua dêh čar pok pơhai hơdôm hơdră bruă anai, lu tơring čar amăng kual Dap Kơdư lêng kơ lăi hơmâo lu tơlơi gun, kah hăng kơƀah hră pơtô ba ngă tui kah hăng mơ̆ng gơnong dlông kiăng; sa, dua mơta hră pơar pơtô ba, kah hăng hơdôm hră pơar pơtrun mơ̆ng hlâo aka ƀu hơmâo tơlơi tŭ ư sa hnong, aka ƀu djơ̆ hăng bruă mă, tơlơi pơhing hơmâo sit nik amăng kual Dap Kơdư hăng rĭm tơring čar. Yă Nguyễn Thị Thanh Lịch, Kơ-iăng Khua jơnum min mơnuih ƀôn sang tơring čar Gia Lai lăi:

“Ră anai, lơ̆m man pơdong kiăng ngă tui sa amăng plĕ tui hră pơtrun mơ̆ng Kơnuk kơna, djop ding jum anom bruă, hăng djop tơring čar dŏ bưp lu tơlơi gun tơnap, dua lĕ hơdôm anom bruă pơtrun man pơdong, hơmâo lu tơhnal pơkă aka ƀu djơ̆ hăng tơlơi gêh găl bơwih ƀong huă mơnuih mơnam ƀơi Gia Lai. Tơlơi tal klâo dơ̆ng lĕ bruă pok pơhai ngă hrom ba yua rơnoh prăk, tơhnal pơkă, pơtô brơi ngă tui kiăng tŭ yua sit nik, jing pran kơtang pơtrut tơlơi bơwih ƀong huă mơnuih mơnam dŏ gun lu đơi”.

Mơ̆ng tơlơi hơmâo sit nik anun, ƀơi kual Dap Kơdư khua mua djop tơring čar rơkâo đĭ hơdôm jơlan hơdră kiăng kơnuk kơna dêh čar sem glăi. Ơi Nguyễn Hữu Tháp Kơ-iăng Khua jơnum min mơnuih ƀôn sang tơring čar Kon Tum lăi:

“Hơdôm tơlơi rơkâo pơ anai, kiăng tañ ngă hră pơtrun pơtô brơi rơđah rơđong sa hnong, ba yua hrom prăk kăk mơ̆ng tơring čar. Dua lĕ tañ pơkă rơnoh, pơtô brơi, amăng anun lŏn pơdong sang, lŏn ngă hmua kơ mơnuih ƀôn sang, biă mă ñu pơ kual ataih, kual asuek. Amăng hrơi blan dŏ tơguan rơđah rơđong hloh, tơring čar ăt pơtum pok pơhai ngă tui akŏ bruă pơhlôm tơhnal pơkă akŏ bruă hăng pơtum brơi mă yua rơnoh prăk kiăng djơ̆ hnong jao”.

Tơdơi kơ hmư̆ hơdôm tơring čar lăi pơthâo, Kơ-iăng khua dêh čar ơi Trần Lưu Quang čih pioh hăng lăng yôm bruă mă mơ̆ng hơdôm tơring čar kual Dap Kơdư dưi ngă laih, ngă gêh găl kơ bruă pok pơhai pơ anăp  adih. Tui hăng Kơ-iăng khua dêh čar, djop tơring čar khom ngă giong bruă mă yua rơnoh prăk jao; mă yua rơnoh prăk kơ rĭm črăn bruă; rơkâo djop sang bruă, ding jum truh pơ djop tơring čar ngă tui mơtam jŭ yap glăi, ngă giong hơdôm hơdră bruă dŏ kơƀah.

Gah tơring čar, Kơ-iăng khua dêh čar pơtrun hiăp ăt pơtrut hmar hơdôm ring bruă hlă dŏ ngă; kơtưn ngă hrom kơplah wah hơdôm tơring čar hăng ding jum anom bruă pơ gơnong dlông laih anun ngă hrom djop sang bruă, rĭm plơi pla pok pơhai ngă tui sa amăng plĕ:

“Kâo rơkâo, ƀơi djop tơring čar lĕ, ƀing khua mua jơnum min mơnuih ƀôn sang tơring čar ƀudah kơ-iăng khua jơnum min mơnuih ƀôn sang tơring čar wai lăng hơdră hơgĕt kah hăng sa čô pô pơpha bruă mă, dŏ kơplah wah djop anom bruă kiăng hơmâo hơdră djru pơsir hĭ. Hăng pô ngă kơ-iăng khua dêh čar, khua git gai mơ̆ng gơnong dlông, kâo jing mơnuih pơpha bruă hăng djop tơring čar laih anun hơdôm khua ding jum, kơ-iăng khua ding jum hlơi aka ƀu tŭ ư hrom tơlơi rơkâo, pơsir mơtam kiăng abih bang ngă bruă hrom. Čang rơmang djop tơring čar hrăm nao rai tơdruă tơlơi thâo thăi amăng bruă mă, hơmâo tơring čar đơ đam mă yua rơnoh prăk tañ biă mă, ngă klă bruă jao. Ăt tui hăng tơlơi pơtrun tơlơi phiăn anun mơ̆n tơdah lăi tong kơ tơlơi djơ̆ găl hrup soh yua hơgĕt gơñu pok pơhai ngă klă, khom hrăm tui hơdră arăng ngă anun kiăng pok pơhai ƀơi anih ta dŏ mă bruă”.

Kơ-iăng Khua dêh čar ơi Trần Lưu Quang ăt lăi lĕ, hrơi blan ngă giong hơdôm Hơdră pơtrun mơ̆ng kơnuk kơna ƀu lu ôh, djop tơring čar amăng kual Dap Kơdư pơtum pok pơhai kiăng ngă giong tañ pơsir hĭ tơlơi dŏ kơƀah; pơhrua nao dơ̆ng hơdôm bruă mă aka ƀu gêh găl, khom ngă giong amăng klâo blan tal  sa thun 2023. Pơđut mông jơnum, Kơ-iăng Khua dêh čar ơi Trần Lưu Quang pơtrun hiăp pơ anăp anai, Anom bruă kơnuk kơna khom čih pioh, pơtum abih, jŭ yap, lăi pơthâo hăng kơ-iăng khua dêh čar hơdôm pok hră git gai djop ding jum, anom bruă, tơring čar ngă tui hơdôm bruă jao tong ten, hơmâo tom hră lăi pơthâo hrơi blan čih pơthâo đĭ hăng khua mua amăng kơnuk kơna dêh čar.