VOV4.Jarai - Mơguah lơ 4/4, ƀơi Hà Nội, Ping gah Khul hơdôm anom bruă gơnong glông pơphun yôm phăn tal hơdor glăi 15 thun akŏ pơjing. Lơ 11/4/2007, Ding jum kơđi čar (tal X) hơmâo tơlơi pơtrun mrô 47 akŏ pơjing Ping gah Khul hơdôm anom bruă gơnong glông hluai tui bruă pơmut 7 grup Ping gah Khul hơdôm anom bruă gơnong glông. Mơng sa Ping gah hơmâo akŏ pơjing amăng rơnuk blah ayăt Prang ƀơi kual blah ngă Việt Bắc hăng 6 grup Ping gah hăng hơdôm rơtuh čô mơnuih apăn bruă Ping gah, truh ră anai, Ping gah Khul hơmâo 61 khul Ping gah hăng rơbêh 7,7 rơbăn čô mơnuih mut Ping gah, jơnum pơƀut ƀơi 5.735 grup Ping gah amăng lŏn ia hăng tač rơngiao. 15 thun laih rơgao, Ping gah Khul hơmâo gir run găn rơgao tơnap tap, tơlơi lông, pơplih yôm phăn hăng djop mơta bruă. Hăng tơlơi pơsit “Gum pơgôp - Ngă pô - Thâo thăi - Tơpă sit - Ba gru”, amăng thun blan pơ anăp Ping gah Khul pơsit pran gơgrong amăng bruă kơđi čar kiăng pơjing, pơđĭ kyar rơwang thun 2020-2025 lĕ : “Pơjing, pơplih pơkra kiăng Ping gah mă bruă tơpă, hơđong kjăp; djă pioh pran gum pơgôp, ngă pô, tơpă sit, pơplih phrâo hăng hrưn đĭ ba gru hiam, gơgrong ba jơlan hlâo amăng mơnuih apăn bruă Ping gah”.

Siu Đoan: Pơblang