VOV4.Jarai-Ding jum kông an jơnum ngă lơphet hơdor glăi 20 thun Akŏ pơjing anom bruă Jơnum min pel ĕp ping gah kông an dêh čar. Găn rơgao 20 thun man pơdong, pơđĭ kyar anom bruă anai hơmâo lăi pơthâo hăng khua mua git gai, pơčrâo ba bruă mă, krăo lăng, tơlơi tơpă ngă bruă amăng ping gah kông an mơnuih ƀôn sang.

Khua ding jum kông an ơi Tô Lâm pơhiăp git gai mông jơnum

Anom bruă Jơnum min pel ĕp bruă mă hơmâo lăi pơthâo hăng Ping gah kông an dêh čar, čih pơkra, pok pơhai ngă tui lu akŏ bruă ĕp lăng, krăo lăng lu mơta bruă sit ƀuh či ngă soh glăi. Mơ̆ng anun, djru kơ lu sang bruă ping gah, anom bruă pơphun bruă ping gah, mơnuih ping gah thâo ƀư̆ pơkra, pơsir hĭ tơlơi soh glăi, ƀu lui tơlơi ngă soh anet jing prong ôh. Pơhiăp ƀơi mông jơnum, Khua ding jum kông an ơi Tô Lâm rơkâo, pơ anăp anai, anom bruă pel ĕp ping gah kông an dêh čar kiăng pơsit hơdră mă bruă “krăo lăng pok pơhư prong, ĕp lăng khom hơmâo bruă phun, bruă yôm”.

Laih dơ̆ng pơtrut bruă ĕp lăng bruă git gai, pơčrâo bruă, pơphun ngă tui akŏ pơdong ping gah, ƀư̆ pơkra ping gah hăng abih gơnong bruă kơđi čar; khom pơgăn khut khăt, pơtrut đuăi soh glăi, pơsir lăp djơ̆ ƀing khua mua, mơnuih ping gah dŏ dong ƀong huă ƀu hiam klă, pơblih hĭ tơlơi pơmin, kơđi čar, pran jua, tơlơi hơdip mơda.

Nay Jek: Pơblang